دوای ئەوەیکە چالاکانی خوێندکاری لە ئێران و کوردستان بە دژی هێرشی کیمیایی بۆ سەر قوتابخانەکان ناڕەزایەتییان دەربڕی، لەلایەن ڕێژیمەوە گوشاری زۆرتریان خراوەتە سەر.
ڕۆژی دووشەممە ٢٢ی ڕەشەمەی ١٤٠١ی هەتاوی، شۆرای سێنفیی خوێندکارانی ئێران ڕایگەیاند: لەبەر ئەوەیکە خوێندکاران بە دژی هێرشی کیمیایی گوماناوی و زنجیرەیی بۆ سەر قوتابخانەکانی ئێران ناڕەزایەتییان دەربڕی و ئەو کردەوە نامرۆڤانەیان مەحکووم کرد، ناوەندە سەرکوتکەرەکانی ڕێژیمیش گوشاری زۆریان خستووەتە سەر خوێندکاران.
لە نوێترین ڕاپۆرتی شۆرای سێنفیی خوێندکاراندا هاتووە: بەهۆی ناڕەزایەتی دەربڕین لەهەمبەر ژەهراویکردنی کچانی قوتابی، دەیان خوێندکار لە زانکۆکانی تاران و تەورێز لەلایەن ناوەندە سەرکوتکەرەکانەوە بانگ کراون و هەڕەشەیان لێ کراوە.
هەروەها لە زانکۆی تەورێز، ٤٠ خوێندکار لەلایەن حەراسەتی زانکۆوە بانگ کراوان و هەڕەشەی دەرکردنیان لێ کراوە.
