هاوکات لەگەڵ بەڕێوەچوونی ڕێوڕەسمەکانی نەورۆز لە شارەکانی ڕۆژهەڵاتی کوردستان، لە زۆرینەی شارەدێ و گوندەکانیش ڕێوڕەسمی نەورۆز بە گڕوتینەوە بەڕێوە چوو.
ئەم ئێوارەیە ڕێکەوتی ۲۹ی ڕەشەمە، لە سەدان گوند و شارەدێی ڕۆژهەڵاتی کوردستان، ئاگری نەورۆز کرایەوە و ڕێوڕەسمی نەورۆز بەڕێوە چوو.
خەڵکی ئاوایی کانی ڕەشی سەر بە شاری بۆکان، ئاگری نەورۆزیان کردەوە بە سەمای جامانە و بە هەڵکردنی ئاڵای پیرۆزی کوردستان، پێشوازییان لە نەورۆزی کۆنی کوردەواری کرد.
هەروەها کچان و کوڕانی شۆڕشگێڕی ئاوایی بەردەڕەشی بانە و گوندی تەنگیسەری سنە، بە هێما نەتەوەییەکانەوە، پێشوازییان لە ساڵی نوێی کوردی کرد.
لەلایەکی ترەوە لە گوندی ڕاژان و لە شارەدێیەکانی زێوە و دزە سەر بە شاری ورمێ، خەڵکی ڕاپەڕیوی کوردستان ئاگری نەورۆزیان کردەوە و بە شێوازێکی تایبەت چوونە پێشوازی ساڵی نوێوە.
هەروەها ڕاپۆرتەکان باس لەوە دەکەن کە ئەم ئێوارەیە هێزە سەرکوتکەرەکانی ڕێژیم لە مەریوان ڕەوانەی شارەدێی "نێ" کران و ئەو شارەدێیەیان میلیتاریزە کرد. بەڵام خەڵکی نیشتمانپەروەری نێ بەرەوڕوویان بوونەوە و ئاگری نەورۆزیان کردەوە.
لەم پێوەندییەدا لە ئاوایی بوڵواناوای دێولان، سەرکوتکەرانی ڕێژیم هێرشیان کردە سەر ئەو خەڵکەی کە دەیانەویست بۆ پێشوازی لە نەورۆز، ڕێوڕەسم بەڕێوە ببەن و باس لەوە دەکرێت کە بۆ بڵاوەپێکردنی خەڵک، تەقەیان کردووە.
