ئەندامان و لایەنگرانی حیزبی دێموکرات لە شارەکانی "سنە، بۆکان و شنۆ"، بەبۆنەی ١٠ی خاکەلێوە ڕۆژی شەهیدانی کوردستان، چالاکیی بەربڵاوی تەبلیغییان بەڕێوە برد.
بەپێی ئەو ڕاپۆرت و هەواڵانەی کە بە ژووری هەواڵی ناوەندی ڕاگەیاندنی حیزبی دێموکرات گەیشتووە، ئەندامان و لایەنگرانی حیزب لە شارەکانی سنە، بۆکان و شنۆ، بەبۆنەی ١٠ی خاکەلێوە ڕۆژی شەهیدانی کوردستان، چالاکیی بەربڵاوی تەبلیغییان بەڕێوە برد.
ئەندامانی حیزب لە شاری سنە و لە گەڕەکەکانی تەکییە و چەمەن، شارەک زاگرۆس، بەهاران، فەرەح و گوڵشەن، بەبۆنەی ١٠ی خاکەلێوە، بە بڵاوکردنەوەی تراکت و وێنەی شەهیدان، چالاکیی بەربڵاوی تەبلیغییان بەڕێوە برد.
لەلایەکی ترەوە ئەندامان و لایەنگرانی حیزبی دێموکرات لە شاری بۆکان بەبۆنەی ١٠ی خاکەلێوە، ڕۆژی شەهیدانی کوردستان، بە ئاڵای پیرۆزی کوردستان و ئارمی حیزب و تراکت و وێنەی شەهیدانی پێشمەرگە و شەهیدانی ڕاپەڕینی شۆڕشی ژینا لە شاری بۆکان و گوندەکانی "وەتەمیش، قۆرغان، شێخاڵی، کانی کەوتێر، سەهۆڵان و یاڵاوا"، چالاکیی تەبلیغییان بەڕێوە برد، هەروەها سەردانی بنەماڵەی شەهیدانیان کرد.
هەروەها لە شاری شنۆ، ئەندامانی بوێر و وەفادار بە گەل و نیشتمان بە بڵاوکردنەوەی تراکتی تایبەت بە ڕۆژی شەهیدان، پەیمانی وەفادارییان لەگەڵ شەهیدانی کوردستان و شەهیدانی شۆڕشی ژینا دووپات کردەوە.
شایانی باسە کە لە ڕۆژانی ڕابردوودا، لە شار و ناوچە جیاوازەکانی کوردستان، ئەندامان و لایەنگرانی حیزب و تێکۆشەرانی کوردستان، بەبۆنەی ڕۆژی شەهیدانی کوردستان بەردەوام و بە شێوەی جۆراوجۆر، چالاکیی تەبلیغییان ئەنجام داوە.
حیزبی دێموکراتی کوردستانی ئێران وێڕای دەسخۆشی و ماندوونەبوونی لە هەموو ئەندامان و لایەنگرانی لە نێوخۆی وڵات، هیوای سەرکەوتن و بەردەوامبوونیان لە ئەرکە حیزبی و نیشتمانییەکاندا بۆ بە ئاوات دەخوازێت.
