حیزبی ڕاجی تەپاکیی بەلووچستان بەبۆنەی ١٠ی خاکەلێوە، ڕۆژی شەهیدانی کوردستان پەیامێکی بڵاو کردەوە.
دەقی پەیامەکە بەم شێوەیەیە:
ڕۆژی شەهیدانی کوردستان بەرز و بەڕێز ڕادەگرین.
١٠ی خاکەلێوە ڕۆژی شەهیدانی کوردستانە. لە وەها ڕۆژێکدا و لە ساڵی ١٣٢٦ی هەتاویدا، یەکەمین سەرۆککۆمار، بناغەدانەر و ڕێبەری حیزبی دێموکراتی کوردستان پێشەوا قازی محەممەد، لە مەیدانی چوارچرای شاری مەهاباد بە شێوەیەکی زۆر ناجوانمێرانە لەسێدارە درا.
بڕیاری لەسێدارەدانی پێشەوا قازی محەممەد و هاوڕێیانی دوای ڕووخانی کۆماری کوردستان، لەلایەن محەممەدڕەزا شای پەهلەوییەوە دەر کرا.
کاروانی شەهیدانی کوردستان دوورودرێژە و شەهید د. عەبدولڕەحمان قاسملوو و شەهید د. سادقی شەرەفکەندی لە ڕێبەرانی دیکەی حیزبی دێموکراتی کوردستانن. ئەم کاروانە پڕ شانازییە بۆ کوردستان و مافەکانی نەتەوەی کورد گیان و ژیانی خۆیان بەخت کردووە.
یاد و ناوی شەهید پێشەوا قازی محەممەد و هەزاران شەهیدی دیکەی کوردستان بەرز و بەڕێز ڕادەگرین.
