لە حاڵێکدا کە چالاکانی مەدەنی و کرێکاری سەبارەت بە خراپتربوونی دۆخی بژێویی ژیانی کرێکاران و خانەنشینکراوانی ئێران لە ساڵی نوێ هۆشدارییان داوە، کۆبوونەوە ناڕەزایەتییەکانی کرێکاران و خانەنشینکراوان لە شارەکانی ئێران هەروا بەردەوامە.
کۆمەڵێک لە خانەنشینکراوان و کرێکارانی حەوت‌تەپە لە شاری شووش، ڕۆژی یەکشەممە ٢٧ی خاکەلێوە، لەهەمبەر دۆخی خراپی بژێویی ژیان و کەمیی حەقدەستەکانیان لە ساڵی نوێ، کۆ بوونەوە و ناڕەزایەتییان دەربڕی.
ناڕازییان لە بەردەم ئیدارەی دابینکردنی کۆمەڵایەتی بەرەو ئیدارەی کار لە شاری شووش ڕێپێوانیان وەڕێ خست و دروشمیان دا.
هەروەها ڕۆژی یەکشەممە خانەنشینکراوان لە شاری شووشتەر کۆبوونەوەی ناڕەزایەتییان بەڕێوە برد و بە ئاماژەدان بە ناودێرکردنی ساڵی نوێ لەلایەن خامنەییەوە بۆ کۆنترۆڵی هەڵاوسان، دروشمیان دا: ''کۆنترۆڵی هەڵاوسان تەنیا دروشمێکی بەتاڵ بوو''.
هەروەها چەندین ڤیدیۆ لە کۆبوونەوەی ناڕەزایەتیی خانەنشینکراوان لە شارەکانی ئەهواز و ئیسفەهان بڵاو بووەتەوە.
ناڕەزایەتیی سێنفی لە ئێران لە حاڵێکدا درێژەی هەیە کە هاوکات خوێندکارانیش دژی ژەهراویکردنی قوتابییان و سەپاندنی حیجابی زۆرەملێ ناڕەزایەتی بەڕێوە دەبەن.
خوێندکارانی دانشکەدەی زانستی کۆمەڵایەتیی زانکۆی عەلامە لە تاران، ڕۆژی یەکشەممە ٢٧ی خاکەلێوە لە کاردانەوە بە حیجابی زۆرەملێ و ژەهراویکردنی قوتابییان کۆبوونەوەی ناڕەزایەتییان بەڕێوە برد.
