وەزیری بەرگریی ئیسرائیل لە کۆنفڕانسێکی ڕۆژنامەوانیدا، سەرەڕای ئاماژەدان بەوەیکە ڕێژیمی ئێران ساڵانە ٧٠٠ میلیارد دۆلار یارمەتیی ماڵیی حیزبوڵڵای لوبنان دەکات، وتی: ئەو ڕێژیمە بەردەوام چەکوچۆڵ و مووشەک بۆ حیزبوڵڵای لوبنان دەنێرێت.
بەپێی ڕاپۆرتی"تایمزی ئیسرائیل"، گاڵانت، وەزیری بەرگریی ئیسرائیل، ڕۆژی پێنجشەممە ٣١ی خاکەلێوەی ١٤٠٢ی هەتاوی لە کۆنفڕانسێکی ڕۆژنامەوانیدا وتی: ڕێژیمی ئێران بەردەوامە لە یارمەتیگەیاندنی ماڵی و چەکوچۆڵی بە گرووپە میلیشیاکانی سەر بە ڕێژیمەکەی.
هەروەها ناوبراو وتیشی، ڕێژیمی ئێران ساڵانە ١٠٠ میلیۆن دۆلار یارمەتیی ماڵیی گرووپی حەماس و هەروەها ساڵانە دەیان میلیۆن دۆلار یارمەتیی ماڵیی گرووپی جیهادی ئیسلامی، بە مەبەستی ئاژاوەگێڕی لە ناوچەکەدا، دەکات.
وەزیری بەرگریی ئیسرائیل لە درێژەدا وتی: ئەگەری هێرش بۆ سەر ئیسرائیل لە چەند بەرەی شەڕەوە زۆرە و گرووپە میلیشیاکانی سەر بە ڕێژیمی ئێران، لە هەڕەشەکردن و کردەوەی تێرۆریستی لە ئیسرائیل، بەردەوامن.
ناوبراو هەروەها لەسەر بەرنامەی ناوکیی ڕێژیمی ئێران وتی: ئەوە ڕێژیمە ڕۆژ لە دوای ڕۆژ زیاتر لە دەسپێڕاگەیشتنی بە چەکی ناوکی نزیک دەبێتەوە و دەبێ بە خێراترین کات پێش لە سەرەڕۆییەکانی ئەو ڕێژیمە بگیردرێت.
