لە درێژەی چالاکییەکانی ئەنجومەنی سەوزی چیا و بووژاندنەوەی دارستانەکانی زاگرۆس، زیاتر لە ١٥٠٠ نەمام لەلایەن ڕێبوارانی ئەندێشەی سەوز لە مەریوان چەقێندران.
لە سێ کاتی جیاواز لە ڕێکەوتەکانی ١٠ی سەرماوەز، ١٤ و ٢٣ی ڕەشەمەی ١٤٠١ی هەتاوی، زیاتر لە ١٥٠٠ نەمام لە جۆرەکانی"بەڕوو، مازوو و قەزوان" بە دەستی ڕێبوارانی ئەندێشەی سەوز لە شوێنە سووتێندراوەکانی قەڵای مەریوان چەقێندران.
ئەو شوێنانەی هاوینی ساڵی ڕابردوو لە درێژەی زنجیرە ئاگرەکانی زاگرۆسدا کەوتنە بەر هێرشی ناحەزان و زیاتر لە ٢٠ جار ئاگریان تێبەر درابوو، لەلایەن ئەنجومەنی سەوزی چیا و ژینگەپارێزانەوە بە چەقاندنی نەمام ئاوەدان کراوەتەوە.
جێی ئاماژەیە کە زۆرینەی ئەو نەمامانە کە لەم هەڵمەتانەدا دانراون لەلایەن قوتابییانی سەرەتایی کوڕانە و کچانەی ئاوایی مووسکی مەریوان بەرهەم هێندراون.
