لە درێژەی مانگرتنی کرێکاران لە ئێران، کرێکارانی شیرکەتەکانی پێترۆشیمی و نەوت و پرۆژەکانی دیکە لە ناڕەزایەتی بە پێنەدان و کەمیی حەقدەستەکانیان و دۆخی بژێویی ژیانیان لە چەندین شاری ئێران مانیان گرت.
ئەمڕۆ یەکشەممە ٣ی بانەمەڕ، کرێکارانی شیرکەتی موبین سەنعەت و کارێکارانی عایەقکاریی پێترۆشیمی لە شاری کەنگان سەر بە پارێزگای بووشێهر و کرێکارانی دوو کانگای مس لە کرمان، بەهۆی کەمیی حەقدەستەکانیان و دۆخی بژێویی ژیانیان مانیان گرت.
لەم پێوەندییەدا ڕۆژی شەممە ٢ی بانەمەڕ، کرێکارانی شیرکەتەکانی پێترۆشیمی و نەوت و چەندین ناوەندی پیشەیی لە دێهلوڕان، عەسەلوویە، یەزد، گەچساران، ئابادان، بەندەری جاسک، بوشێهر و شیراز، بە نیشانەی ناڕەزایەتی بە دۆخی بژێویی ژیان و وڵامنەدانەوەیان لەلایەن کاربەدەستانی ڕێژیمەوە، مانیان گرت.
لەلایەکی دیکەوە، ڕۆژی شەممە، کۆنفڕانسێک لە شاری کۆڵنی ئاڵمان بە مەبەستی پشتیوانی لە مەنشووری کەمترین داواکارییەکانی سەندیکاکانی کرێکاری و ڕێکخراوە مەدەنییەکانی ئێران بەڕێوە چوو.
ڕەزا شەهابی و حەسەن سەعیدی، دوو ئەندامی زیندانیکراوی سەندیکای کرێکارانی شیرکەتی یەکەی ئوتوبووسڕانیی تاران، لە پەیامێکدا بۆ کۆنفڕانسی کۆڵن، پشتیوانییان لە مانیفێستی کەمترین داواکاریی ٢٠ ڕێکخراو کرد و ڕایانگەیاند کە تاکە ڕێگای دەربازبوون، "یەکگرتوویی و ڕێکخستنە".
