مام محەممەد نیگەهدار، باوکی شەهید سورەیا نیگەهدار (ئاسۆ) لە شاری سنە کۆچی دوایی کرد.
بەپێی ئەو هەواڵ و زانیارییانەی کە بە ژووری هەواڵی ناوەندی ڕاگەیاندنی حیزبی دێموکرات گەیشتووە، ڕۆژی دووشەممە ١٤ی خاکەلێوەی ١٤٠٢ی هەتاوی، مام محەممەد نیگەهدار باوکی شەهید سورەیا نیگەهدار ناسراو بە ئاسۆ، لە تەمەنی ٩١ ساڵیدا و لە شاری سنە کۆچی دوایی کرد.
مام محەممەد ساڵی ١٣١١ی هەتاوی لە بنەماڵەیەکی خۆشناو و نیشتمانپەروەری شاری سنە لەدایک بوو. لەگەڵ گەورەبوون و زیادبوونی تەمەنیدا، ئاشنا بە کوردایەتی بوو و لە بنەماڵەکەیاندا بیری نیشتمانپەروەری گەشەی کرد.
دواتر کچێکی مام محەممەد بە ناوی سورەیا نیگەهدار ناسراو بە ئاسۆ، بوو بە پێشمەرگەی حیزبی دێموکرات و بۆ ئازادی و سەربەسەتیی کوردستان خەباتی کرد.
شەهید ئاسۆ ڕێکەوتی ٢٠ی سەرماوەزی ١٣٦٦ی هەتاوی، لە ناوچەی دۆڵەسووری باشووری کوردستان و بەکارەساتی دڵتەزێنی تەقینەوەی نارنجۆک، شەهید بوو.
مام محەممەد نیگەهدار دوای شەهیدبوونی کچەکەی، بیری نیشتمانپەروەری و ئازادیخوازی لە دڵیدا زیاتر بوو و هەموو کات وەک دڵسۆزێکی کورد و کوردستان لە خزمەت ئازادیخوازان و تێکۆشەرانی گەلەکەیدا بوو.
