لە درێژەی ناڕەزایەتیی مامۆستایان لە ئێران و کوردستان، کۆمەڵێک لە مامۆستایان لە بەردەم ئیدارەکانی پەروەردە و بارهێنانی چەندین شار کۆبوونەوەی ناڕەزایەتییان بەڕێوە برد.
ڕۆژی پێنجشەممە ١٧ی خاکەلێوە، کۆمەڵێک لە مامۆستایان لە شارەکانی ''هەمەدان، کرماشان، مەلایەر، نەیشابوور، کەرەج، ڕۆبات کەریم و تاران'' لە بەردەم ئیدارەی پەروەردە و بارهێنانی ئەو شارانە کۆ بوونەوە و داوای وڵامدانەوەی بەرپرسانی ڕێژیمیان کرد.
لەو کۆبوونەوە ناڕەزایەتییانەدا، مامۆستایان سەرەڕای داواکاری بۆ پێڕاگەیشتن بە شێوەی پلەبەندییەکان، ناڕەزایەتی لە دۆخی نالەباری بژێویی ژیان و بەدواداچوون بۆ موچەی دواکەوتووی خۆیان، داوای ئازادیی خێرا و بێمەرجی مامۆستایانی دەسبەسەرکراویان کرد.
بەپێی ڕاپۆرتی کاناڵی سێنفیی مامۆستایانی ئێران، ژمارەیەک لە مامۆستایان لە بەردەم وەزارەتی پەروەردە و بارهێنان، لەلایەن هێزەکانی ڕێژیمەوە دەسبەسەر کران.
جێگەی ئاماژەیە کە لە دوای ناڕەزایەتی و مانگرتنی مامۆستایان لە سەرانسەری ئێران، وەزیری پەروەردە و بارهێنانی ڕێژیم بە ناچاری دەستی لەکار کێشایەوە.
