لە درێژەی ژەهراویکردنی قوتابییانی قوتابخانەی کچان لە کوردستان، ئەمڕۆ قوتابییانی قوتابخانەکانی شارەکانی نەغەدە، ورمێ، دیواندەرە و ئەردەبیل ژەهراوی کران.
بەپێی ئەو هەواڵانەی کە بە ژووری هەواڵی ناوەندی ڕاگەیاندن گەیشتووە، ڕۆژی شەممە ١٩ی خاکەلێوەی ١٤٠٢ی هەتاوی، قوتابییانی قوتابخانەکانی نەغەدە، دیواندەرە، ورمێ ژەهراوی کران و بۆ نەخۆشخانە گواستراونەتەوە.
قوتابییانی قوتابخانەی کچانەی فەدەک و شاهێد لە شاری نەغەدە، قوتابییانی قوتابخانەکانی "ئێعتسامی و بێنت ئەلهودا" لە دیواندەرە و قوتابخانەی کچانەی سەعدی لە ورمێ ژەهراوی کران و بۆ ناوەندە دەرمانییەکان گواستراونەتەوە.
هەروەها کچانی قوتابخانەیەک لە شاری ئەردەبیل ژەهراوی کران و سەرچاوە خۆجێییەکان باسیان لەوە کردووە کە قوتابییەکان تووشی حاڵەتی تەنگەنەفەسی بوون و پاشان بۆ نەخۆشخانە گواستراونەتەوە.
