ڕۆژی شەممە ١٨ی خاکەلێوەی ١٤٠٢ی هەتاوی، مام حەمید عەلیزادە، خەڵكی گوندی ''سپیدەرە''ی سەر بە ناوچەی "شپیرانـ"ـی ورمێ بەهۆی بەساڵاچووییەوە، لە شاری ورمێ کۆچی دوایی کرد.
مام حەمید کەسایەتییەکی دیاری کۆمەڵایەتی و نیشتمانپەروەری ناوچەی شپیران بوو و لەنێو خەڵكی ناوچەدا ڕێزی تایبەتی لێ دەگیرا.
کوڕێکی مام حەمید بە ناوی عەسکەر عەلیزادە، پێشمەرگەی حیزبی دێموکرات بوو و ڕێژیمی ئێران بەو هۆیەوە بەردەوام ئازار و ئەزییەتی مام حەمیدی دەدا و بە دەیان جار گرتیان و بە دەیان جار ئازار و ئەزییەتیان دا، هەروەها گوندەکەیان سووتێندرا و دەربەدەر کران.
مام حەمید و بنەماڵەکەی دوای سووتاندنی گوندەکەیان چەندین شوێنی بۆ ژیان هەڵبژارد، بەڵام هەر لەژێر ئازار و ئەزییەتی دوژمندا بوو و وازیان لێ نەدەهێنا. تا سەرەنجام لە گوندی ''بالاجغـ''ـی نزیک شاری ورمێ نیشتەجێ بوون.
هەموو ئەو ساڵانە کە کاک عەسکەر پێشمەرگەی حیزب بوو و بەرپرسایەتیی جۆراوجۆری وەک ئەندامیەتیی کۆمیتەی شارستانی سەڵماس، بەرپرسی تەشکیلاتی ناوچە و بەرپرسی کۆمیتەی شارستان بوو، دوژمن زۆرتر و زۆرتر گوشاری بۆ مام حەمید دەهێنا، بەڵام ئەو مرۆڤە خاوەن ئیرادەیە هەرگیز نە تەسلیمی دوژمن بوو، نە دەستی لە پشتگیریی کوڕە پێشمەرگەكەی هەڵگرت و بەردەوام دەیوت: "من شانازی بە پێشمەرگەبوونی كوڕەكەمەوە دەکەم، با دوژمن هەر بمگرێت و ئازارم بدات."
حیزبی دێموکراتی کوردستانی ئێران بەبۆنەی کۆچی دوایی مام "حەمید عەلیزادە" سەرەخۆشی لە بنەماڵەی بەڕێزیان و سەرجەم خەڵکی نیشتمانپەروەری ناوچەی شپیران دەکات و خۆی بە هاوخەمیان دەزانێت.
