ئەندامان و لایەنگرانی حیزبی دێموکرات لە شاری سەقز بە نووسینی دروشم دژی دەسەڵات، چالاکیی تەبلیغیی بەربڵاویان بەڕێوە برد.
بەپێی ئەو گرتە ڤیدیۆ و وێنانەی کە بە ژووری هەواڵی ناوەندی ڕاگەیاندنی حیزبی دێموکرات گەیشتووە، ڕۆژی سێشەممە ١٩ی بانەمەڕی ١٤٠٢ی هەتاوی، ئەندامان و لایەنگرانی حیزب لە شاری سەقز، بە نووسینی دروشم دژی دەسەڵات، چالاکیی تەبلیغییان بەڕێوە برد.
ئەندامانی حیزب لە شاری سەقز، بە نووسینی دروشمگەلی "مەرگ و نەمان بۆ خامنەیی"، "سڵاو لە قازی، قاسلموو و شەرفکەندی" لە شەقامەکانی ئەو شارە، لەسەر درێژەدان بە ڕێبازی دێموکرات جەختیان کردەوە.
ئەویندارانی ڕێبازی دێموکرات لە شاری سەقز هەروەها پەیمانی وەفادارییان لەگەڵ حیزب و ڕێبازی شەهیدان نوێ کردەوە و جارێکی دیکە بە دوژمنانی گەلی کوردیان سەلماندەوە کە تا کوردێک بمێنێت، کوردستانیش دەمێنێت.
حیزبی دێموکراتی کوردستانی ئێران وێڕای سپاس و ماندوونەبوونی لە هەموو ئەندامان و لایەنگرانی لە ڕۆژهەڵات، هیوای بەردەوامبوونیان لە ئەرکە حیزبی و نەتەوەییەکاندا بۆ بە ئاوات دەخوازێت.
