لەگەڵ خراپتربوونی دۆخی ئابووری، ناڕەزایەتییەکان سەبارەت بە دابەزینی بەردەوامی دۆخی ژیان زیاتر پەرەی سەندووە و جگە لە ناڕەزایەتیی کرێکاری، خانەنشینکراوان لە ماوەی ڕۆژانی یەکشەممە و دووشەممەدا لانیکەم ١٧ کۆبوونەوەی ناڕەزایەتییان بەڕێوە بردووە.
ڕۆژێک دوای دادگاییکردنی ژمارەیەک لە خانەنشینکراوانی خووزستان لە دادگای ئینقلابی ئەهواز، بە تاوانی کۆبوونەوە و ناڕەزایەتی دەربڕین بەرامبەر بە برسێتی، خانەنشینکراوانی ڕێکخراوی دابینکردنی کۆمەڵایەتی، پیشەسازیی فولاد، مامۆستایانی خانەنشین و خانەنشینکراوانی موخابرات، لانیکەم لە ١٧ شاردا هاتنە سەر شەقامەکان و سەبارەت بە دۆخی نالەباری ژیان ناڕەزایەتییان دەربڕی.
لە شاری ئیسفەهان، خانەنشینکراوانی موخابەرات ڕوو بە بەرپرسانی بونیادی سپای پاسداران ڕایانگەیاند: ''ئێمەی خانەنشینکراوان لە کۆبوونەوە بەردەوام دەبین تا ئەو کاتەی مافی یاسایی خۆمان بەدەست دەهێنین."
جگە لە کۆبوونەوەی ناڕەزایەتیی خانەنشینکراوان، ناڕەزایەتیی کرێکاران لە دژی دواخستنی حەقدەست و نەبوونی ئەمنیەتی کار و بێکاریی بەکۆمەڵ بەردەوامە و ڕۆژی دووشممە ٥ی پووشپەڕ کرێکارانی نەیشەکەری حەوت تەپە، نەساجیی بروجێرد و پێرسۆنێلی شیرکەتی ڕفاهی تەورێز ناڕەزایەتییان بەڕێوە برد.
هەتا ئێستا بەرپرسانی ڕێژیمی ئێران جگە لە دۆسییەسازی و دەرکردنی سزای قورس بۆ سەر ناڕازییان، هیچ وڵامێکی بە داواکاریی توێژەکانی ناڕازی کۆمەڵگە نەداوەتەوە.
