ئەمساڵ بەرینتر لە ساڵانی پێشوو خەڵکی کوردستان و ئەندام و لایەنگرانی حیزبی دێموکرات بە بڵاوکردنەوەی وێنە، تراکت و وتە بەنرخەکانی دوکتور قاسملووی ڕێبەر، لە ئیلام و کرماشانەوە تا سنە و ورمێ، زیاتر لە جاران کوردستانیان کردووەتە دۆزەخی کۆماری ئیسلامیی ئێران.
بەپێی هەواڵ و ناردنی ئەو شەپۆلە چالاکییانەی کە بە ژووری هەواڵی ناوەندی ڕاگەیاندنی حیزبی دێموکراتی کوردستانی ئێران گەیشتووە سەرەڕای کەشێکی یەکجار توندی میلیتاریستی و ئەمنی کە بەسەر کوردستاندا زاڵە، ئەندامان و لایەنگرانی چاونەترس و سەربەرزی دێموکرات بە چالاکیی تەبلیغیی بەربڵاو لە شوێنە گشتی و هەستیارەکاندا زیاتر لە ساڵان مەیدانیان بە دوژمن تەنگ کردووە و پیلان و زەختی ڕێژیمیان پووچەڵ کردووەتەوە.
بەشێکی بەرچاو لەو چالاکییانە وەکوو هەمیشە لەلایەن قوتابیانی قارەمانی قاسملووی پێشەنگەوە لە شارەکانی ئیلام، ئەیوان و "سەرپێل"ی مەکۆی کوردایەتی و نیشتمانپەروەری بەڕێوە چووە و هەموو بازاڕ و شەقام و کۆڵانەکانی ئەو شارانە بوونەتە پێشانگای وێنە و تراکت و وتە بەنرخەکانی شەهید قاسملوو و دروشمی شۆڕشگێڕی.
لە درێژەی چالاکییە تەبلیغییەکانی تایبەت بە ٢٢ی پووشپەڕ، ئەندامان و لایەنگرانی ژیر و وریا و خەڵکی دێموکرات‌دۆستی شارەکانی سەقز، مەریوان، سەردەشت، شنۆ، بۆکان، بانە، مەهاباد و ناوچە و گوندەکانی سەر بەو شارانە وێڕای بەرپەرچدانەوە و پووچەڵکردنەوەی پیلانەکانی دوژمن جارێکی دیکە سەلماندیان کە دێموکرات هێزی بەهێزی گەلە و بە تیرۆر و شەهیدکردن، لەسێدارەدان، بەندیخانە، ئەشکەنجە، و هیچ پیلان و هێزێکی دوژمن بە چۆکدا نایە و تا بەو شێوەیە خەڵکی کوردستانی لە پشت بێ، ئەو هێزەیە کە خەونی دوژمنەکانی ئاوێتەی ترس و دڵەڕاوکێ کردووە و دەیکا.ت
ئەو ناوچە و گوندانەی بێجگە لە خودی شارەکان کە چالاکیی تەبلیغییان تێدا کراوە بریتین لە:
گوندەکانی گامێشان، کانی گورگە، قورمیش، کانی شقاقان، ڕێگای بۆکان میناندواو، قوڵغەتەپە، باخچە، گۆڕستانی کوڵتەپە لەسەر مەزاری شەهید ئەسعەد ڕەحیمی و دەوروبەری ترمیناڵی تاران، سەر بە شاری بۆکان.
گوندی ڕۆسەمان سەر بە ناوچەی خوڕخوڕەی سەقز.
نێوشار و جاددەی بێورانی سەردەشت.
سینگان، شارۆچکەی نەڵۆس ، گوندەکانی دێشەمس، باڵاگیر و قەرەسەقەڵ، سەر بە شاری شنۆ.
ئاوایی ئوسووکەند سەر بە ناوچەی شاروێرانی مەهاباد.
شاری بانە لە گەڕەکەکانی، جادەی سلێمانی، گەڕکی گوڵشار، شەهرەکی لالە، شەهرەکی سەرچنار، بنی ڕەزان، گەڕەکی ئەماکن، تەپەی سۆغانان و دەوروبەری خواجامیر
