ئەندامان و لایەنگرانی ماندوونەناسی حیزبی دێموکرات لە نێوخۆی وڵات ڕۆژی "٢٢ی پووشپەڕ"یان بە چالاکیی بەربڵاوی تەبلیغیی لە شاری سنە و گوندەکانی چەمشاری سنە، بازاڕی سەقز، شاری بانە و گوندەکانی بۆکان یاد کردەوە.
تێکۆشەرانی ڕێگای ڕزگاریی کوردستان بەبۆنەی ٢٢ی پووشپەڕ، ڕۆژی کارەساتی تێرۆری ڕێبەر و سەرکردەی ناسراوی حیزب و گەل، دوکتور قاسملوو و هاوڕێیانی بەدەستی تێرۆریستان و شوێنکەوتوانی تاریکی، لە گەڕەکەکانی فەرەح، کارامووزی، کەمەربەندی ٢٥ و شەقامی تەختی ئاواییەکانی چەمشاری سنە وەکوو ئاواییەکانی، ئاڵیجان، چەتان، تازاوا، عەلی ئاوای دۆڵەڕەش، موعین ئاوا و سەراوقامیش و هەروەها لەنێو بازاڕی شاری سەقز، شاری بانە و ئاواییەکانی سەر بە شاری بۆکان وەکوو، پاشبڵاغ، گردی قەرەوڵخانە و گردی قەبران، بە بڵاوکردنەوەی وێنەی دوکتور قاسملوو، ئاڵای کوردستان و لۆگۆی حیزبی دێموکرات و نووسینی دروشمی شۆڕشگێڕی بەڵێنیان لەگەڵ خاکی پیرۆزی نیشتمان و خوێنی شەهیدانی نەتەوەکەمان بە تایبەت هزر و بیری شەهیدی سەرکردە دوکتور قاسملووی هەرمان نوێ کردەوە.
