کۆچکردن و کۆچاندنی خەڵکی شارەکانی ئێران بۆ کوردستان و بە پێچەوانەوە بۆ گۆڕینی دێمۆگرافیی کوردستان لەلایەن ڕێژیمەوە، بە شێوەیەکی سیستماتیک و بەرنامەبۆداڕێژراو خێراتر کراوە.
بەپێی ئەو هەواڵ و زانیاریگەلەی کە بە ژووری هەواڵی ناوەندی ڕاگەیاندنی حیزبی دێموکرات گەیشتووە، ماوەیەکە بە بیانووی کەم‌ئاویی پارێزگا و شارەکانی ئێران وەکوو ئیسفەهان، شیراز، یەزد و کرمان، لێشاوی کۆچکردن و کۆچاندنی سیستماتیکی خەڵکی ئەو شارانە بۆ کوردستان لەلایەن ڕێژیمەوە خێراتر کراوە و ئەمەش مەترسییەکی گەورەیە بۆ سەر گۆڕینی حەشیمەتی شارەکانی کوردستان و داهاتوویەکی پڕ لە کێشەی بۆ کوردستان دەبێت.
هەر بەپێی ئەو زانیارییانە، خەڵکی شارەکانی ئێران بە پارەیەکی زیاتر خانووبەرە و موڵک و زەویی کشتوکاڵی کوردستان دەکڕن و کەسگەلی هەلپەرست و نەزانیش یارمەتیدەری ئەم پیلانەی ڕێژیمن.
شایانی باسە کە پارێزگاکانی ئێران بە تایبەت پارێزگا ناوەندییەکانی، تووشی کەم‌ئاویی و بێ‌ئاویی بوون و ئەمەش بیانوویەکە بۆ بەتاڵانبردنی ئاوی کوردستان و جێبەجێکردنی پیلانی گۆڕینی دێموگرافیی کوردستان.
وشیاری و چاوکراوەیی کۆمەڵگەی کوردستان بە تایبەت کۆمەڵگەی مەدەنی و سیاسی دەتوانێت ئەم پیلانەی ڕێژیم پووچەڵ بکاتەوە و پێش لەو کارەساتە بگرێت کە کۆماری ئیسلامی دەیهەوێت بەسەر کوردستانیدا بێنێت.
