ڕۆژی یەکشەممە ٢٥ی پووشپەڕ، کاک جەعفەر عەبدوڵڵاهی ناسراو بە جەعفەر قەندی، پێشمەرگەی پێشوو و کەمئەندامی حیزبی دێموکراتی کوردستانی ئێران، خەڵکی گوندی "مەمێند" سەر بە شاری نەغەدە, بەهۆی نەخۆشییەوە کۆچی دوایی کرد.
کاک جەعفەر لە بنەماڵەیەکی نیشتمانپەروەر لەدایک بووە و باوکی ناوبراو بە ناوی سمایل قەندی، پێشمەرگەی کۆماری کوردستان بووە.
کاک جەعفەر لە ڕیزەکانی هێزی پێشمەرگەی کوردستان بەوپەڕی فیداکاری و دڵسۆزی لە پێناو بەرگری لە نیشتمانەکەی دژی هێرشی هێزە داگیرکەرەکانی ڕێژیمی ئیسلامیی ئێران خەباتی کردووە.
کاک جەعفەر ساڵی ١٣٦١ی هەتاوی، لە شەڕێکی نابەرابەردا دوای پاشەکشەکردن بە هێزی دوژمن و لێدانی زەربەی قورس لە هێزەکانی دوژمن لە "دارەلەک" سەر بە ناوچەی شاروێرانی مەهاباد بریندار بوو و لاقێکی لەدەست دا.
ناوبراو سالی ١٣٦٤ی هەتاوی، بۆ ماوەی ساڵێک بۆ شاری "تاکستان" لە قەزوین دوور خرابووەوە.
حیزبی دێموکراتی کوردستانی ئێران بەبۆنەی کۆچی دوایی کاک جەعفەر قەندی، سەرەخۆشی لە بنەماڵە و کەسوکاری ناوبراو دەکات و خۆی بە هاوخەمیان دەزانێت.
