کاک ئەفشین نادریان، ئەندامی حیزبی دێموکراتی کوردستانی ئێران و خەڵکی شاری بۆکان، بەهۆی ڕووداوی هاتوچۆوە گیانی لەدەست دا.
لە چەند ڕۆژی ڕابردوودا، کاک ئەفشین نادریان، خەڵکی بۆکان و ئەندامی چالاک و هەڵسووڕی حیزبی دێموکرات لەو شارە، تووشی ڕووداوی هاتوچۆ بوو و بەو هۆیەوە ماڵاوایی لە ژیان کرد و دڵە پڕ لە هیواکەی لە لێدان کەوت.
کاک ئەفشین نادریان، وێڕای ئەوەیکە ئەندامێکی دڵسۆز و چالاکی حیزب بوو، نەوەی شەهیدێکی حیزبیش بوو بە ناوی شەهید "مەشەدی فەتاح نادریان" کە لە ڕێبازی کوردایەتیدا گیانی پاکی فیدای ئازادی و سەربەستیی کوردستان کرد.
شایانی باسە کە کاک ئەفشین نادریان ساڵی ۱۳۹۹ی هەتاوی، پێوەندیی بە تەشکیلاتی حیزبی دێموکراتی کوردستانی ئێرانەوە گرت و تا دواهەناسەی ژیانی وەک ئەندامێکی چالاک و هەڵسووڕ ئەرکە حیزبییەکانی بەباشی بەجێ گەیاند.
حیزبی دێموکراتی کوردستانی ئێران، بەبۆنەی کۆچی دوایی کاک ئەفشین، پرسە و سەرەخۆشی لە بنەماڵە و کەسوکاری ناوبراو دەکات و خۆی بە هاوخەمیان دەزانێت.
