لە درێژەی کۆبوونەوە ناڕەزایەتییەکانی چین و توێژە جیاوازەکانی ئێران و کوردستان بە دژی کۆماری ئیسلامی، کرێکاران، پەرستاران، خانەنشینکراوان و وەرزێڕان، کۆبوونەوەی ناڕەزایەتییان بەڕێوە برد.
ڕۆژی دووشەممە ١٢ی پووشپەڕی ١٤٠٢ی هەتاوی، کۆبوونەوەی کرێکارانی ناڕازیی نەیشەکەری هەفت‌تەپە و خانەنشینکراوانی کۆمپانیای موخابرات لە چەندین شاری ئێران بەڕێوە چوو.
هەروەها پەرستاران لە سیستان و بەلووچستان و بەڕێوەبەرانی هێڵی پێنجی مێترۆی تاران بە دژی سەرەڕۆییەکانی کۆماری ئیسلامی و پێنەدانی مافەکانیان، کۆبوونەوەی ناڕەزایەتی و مانگرتنیان بەڕێوە برد.
لەلایەکی ترەوە خانەنشینکراوانی کۆمپانیای موخابرات لە شارەکانی ئەهواز، مەشهەد، کرماشان، سنە، بەندەرعەباس و چەند شارێکی دیکەی کوردستان و ئێران، بە نیشانەی ناڕەزایەتی دەربڕین لەهەمبەر پێنەدانی مووچە و مافەکانیان لەلایەن بەرپرسانی کۆماری ئیسلامیی ئێرانەوە، بە دروشمی "تا مافی خۆمان بەدەست نەهێنین، دانانیشین" کۆبوونەوەی بەربڵاوی ناڕەزایەتییان بەڕێوە برد.
