ناوەندیی بەڕێوەبەریی حیزبی دێموکراتی کوردستانی ئێران ڕایدەگەیەنێ زۆرترین تواناکانی خۆی بۆ پشتیوانی لە شۆڕشی نوێ لە کوردستان تەرخان دەکات
ناوەندی بەڕێوەبەریی حیزبی دێموکراتی کوردستانی ئێران لە ڕاگەیاندراوێکدا بە بۆنەی ٣٤ ساڵەی تێرۆری دوکتور عەبدولڕەحمان قاسملوو و هاوڕێیانی بە دەستی دیپلۆمات تێرۆریستەکانی کۆماری ئیسلامیی ئێران لە شاری ڤییەن پێتەختی وڵاتی ئۆتریش، وێڕای شوێندانەریی بیروئەندێشەکانی شەهید دوکتور قاسملوو لەسەر شۆڕشی ژینا و ڕەنگدانەوەیان لەسەر ویست و داخوازییەکانی خەڵک لە سەر شەقامەکانی کوردستان، لە پۆلێنبەندیی هەڵوێست و سیاسەتەکانی حیزبی دێموکراتدا، تەرخانکردنی زۆرترین تواناکانی حیزب بۆ پشتیوانی لە شۆڕشی نوێ لە کۆمەڵگەی کوردستان و سەرانسەری ئێران وەک ئەرکی سەرەکیی ناو دەبات.
ناوەندی بەڕێوەبەریی حیزبی دێموکرات بۆ بەڕێوەبردنی ئەم پشتیوانییە لە شۆڕشی نوێی کۆمەڵگەی کوردستان کە بە "وەئەستۆگرتنی ئەرکێکی قورس و پیرۆز" ناوی لێدەبا، پێکهێنانی یەکگرتوویی و هاوکاریی هێز و ڕێکخراوەکانی کوردستان و، تێکۆشان بە ئامانجی پێکهێنانی بەدیلێکی دێموکراتیک و فرەنەتەوە بۆ قۆناخی دوای کۆماری ئیسلامی بە پێویست دەزانێت.
