هیوا عەزیزپوور، وەرزشوانی خەڵکی سەقز، لەلایەن دەزگای قەزایی ڕێژیمەوە، ٣٩ مانگ بەندکردنی بەسەردا سەپێندرا.
بەپێی هەواڵی ئەنجومەنی زیندانییە سیاسییەکانی ڕۆژهەڵاتی کوردستان "خۆڕاگری"، لە ماوەی ڕۆژانی ڕابردوودا، هیوا عەزیزپوور، ڕاهێنەر و وەرزشوانی خەڵکی شاری سەقز، لەلایەن لقی ١ی دادگای ئینقلابی ڕێژیم لەو شارە، بە سەرۆکایەتیی "جەواد مستەفایی"، بە تۆمەتی "ئەندامەتی لە یەکێک لە حیزبە دژبەرەکانی کۆماری ئیسلامی"، ٣١ مانگ و ١٥ ڕۆژ بەندکردن و بە تۆمەتی "پڕوپاگەندە دژی ڕێژیم"، سزای ٧ مانگ و ١٥ ڕۆژ بەندکردنی بەسەردا سەپێندرا.
هیوا عەزیزپوور لە کاتی ناڕەزایەتییە گشتییەکان بە دژی هێرشی کیمیایی سیستەماتیکی ڕێژیمی ئێران بۆ سەر قوتابخانەکان، ناڕەزایەتیی دەربڕی و هەر بەو هۆکارەش دەسبەسەر کرا.
ناوبراو ڕۆژی پێنجشەممە ١٨ی ڕەشەمەی ١٤٠١ی هەتاوی، لەلایەن هێزە سەرکوتکەرەکانی کۆماری ئیسلامییەوە لە ماڵەکەی خۆیدا دەسبەسەر کراوە و دوای نزیکەی ١٢٠ ڕۆژ دەسبەسەربوون، بە دانانی بارمتەی ٧٠٠ میلیۆن تمەنی و بە شێوەی کاتی تا کۆتاییهاتنی دادگاییکردنەکەی ئازاد کرابوو.
