سەرەڕای هەوڵی بێ وچان و تاقەتپڕووکێنی ژینگەپارێزان و پارێزەرانی نیشتمان لە چەند ڕۆژی ڕابردوودا، سووتانی دارستانەکانی مەریوان هێشتا بەردەوامە و کۆنترۆڵ نەکراوە.
هەرچەند هەموو ساڵێک کۆماری ئیسلامی و بەکرێگیراوانی ئاگر لە جەستەی کوردستان بەردەدەن، بەڵام ئەمساڵ پێوانەی ئاگرەکە زۆر زیاتر و کوتوپڕتر لە ساڵانی پێشوو بووە، بە تایبەت لە شاری مەریوان و دەوروبەری بە جۆرێک بوو کە ئەنجومەنی سەوزی چیای مەریوان بەپەلە داوای لە خەڵکی کوردستان و ژینگەپارێزانی کورد کرد کە بە هانایانەوە بچن و یارمەتیدەریان بن لە کوژاندنەوەی ئاگرەکەدا.
سەرەڕای بە هاناوەچوونی خەڵکی کوردستان و ژینگەپارێزانی سنە، پاوە، بانە و سەقزیش، هێشتا لە دەوروبەری ئاواییەکانی دەرەوەران، کیکن، نجێ، هەنجیران، مڕانە، بایەوە و کۆڵیت ئاگرەکە بەتەواوی کۆنترۆڵ نەکراوە.
هەر لەو پێوەندییەدا پێنج چالاكی ژینگەپارێزی مەریوان بە ناوەکانی ئازاد ڕۆحی، لایەق ئەحمەدی، سەرکەوت عێبادی، ئالان ئەردەشیری و دلێر مەحەممەدی لە ماوەی ڕۆژانی ڕابردوودا لەلایەن بەكرێگیراوانی ڕێژیمەوە دەسبەسەر كران و چارەنووسیان ڕوون نییە.
لەلایەکی دیکەوە لە چەند ڕۆژی ڕابردوودا گوندەکانی "مەزناوا"، "هەزنی"، "گاکی" و "زەردەكانی" لە ناوچەی ئالانی سەردەشت کەوتنە بەر ڕقی داگیرکەران و ٥٠ هێکتار لە دارستانەکانی ئەو گوندانە لەلایەن داگیرکەران و بەکرێگیراوانیانەوە سووتێندران.
بەپێی سەرچاوەكانی هەواڵ، ئەمساڵ زیاتر لە ١٨ جار ئاگركەوتنەوە لە ناوچەی ئالانی سەردەشت و دارستانەکانی ئەم شارە تۆمار کراوە و لە ئەنجامدا بە گشتی زیاتر لە ٨٠ هێکتار لە دارستانەكان لەنێو چوون.
