ئەندامان و لایەنگرانی حیزبی دێموکراتی کوردستانی ئێران لە بەرەبەری ٢٥ی گەلاوێژ، ساڵڕۆژی دامەزراندنی حیزبی دێموکرات، لە بەڕێوەبردنی کار و چالاکیی تەبلیغی لە شار و ناوچەکانی کوردستان هەروا بەردوامن و شکۆی زیاتریان بەو ڕۆژە پیرۆزە بەخشیوە.
تێکۆشەرانی دێموکرات لە ناوچەکانی ''مەحاڵ، شاروێران و چۆمی مەجیدخان'' سەر بە شاری مەهاباد لە بەرەبەری ٢٥ی گەلاوێژ، ساڵڕۆژی دامەزرانی حیزبی دێموكراتی كوردستانی ئێران، چالاكیی بەربڵاویان لەو ناوچەیە ئەنجام داوە و بە بڵاوكرنەوەی تراكت و پۆستێر، گوندەكانی ئەو ناوچەیان لە وێنە و پۆستێری تایبەت بە ٢٥ی گەلاوێژ ڕازاندەوە، هەروەها پیرۆزبایی خۆیان ئاراستەی حیزبە خۆشەویستەكەمان بە گشتی و بنەماڵەی سەربەرزی شەهیدان، زیندانییانی سیاسی، كەمئەندامانی حیزب و هەموو پێشمەرگە قارەمانەكانمان لە شاخ کرد.
ئەو گوند و شوێنانەی مەهاباد كە چالاكییان تێدا بەڕێوە چووە بریتین لە ئاواییەكانی: ''بەردەمێش، كەپەكەند، ئازاد، بۆزە، حەوڵاباد، خاتوونباغ، بەسرێ، قەڵات، ساروانە، دەرمان، قزڵجە، حاجی ئەڵیكەند، قوڵقوڵە، بەفرەوان و شارەدێی سەرچنار.''
ئەندامانی دڵسۆزی حیزبی دێموکرات لە پیرانشار لە ناوچەی بەربنە، لە سێڕای گردەسوور، گوندی گردی‌کاوڵان، حەوت شێخان و ماشکان و هەروەها لە نەڵین و گردەشینان بە بڵاوکردنەوەی تراکت و پۆستێر، یادی ٧٨ ساڵەی دامەزراندنی حیزبی دێموکراتیان بەرز و پیرۆز نرخاند و بە گوڕتر لە جاران لەسەر بەردەوامیی ڕێبازی حیزبی دێموکرات پێداگرییان کردەوە.
هاوکات لە شاری بانە، ئەندامانی بوێری حیزبی دێموکرات لە ئاواییەکانی ''کۆخان، سەدبار، سوێروێ، بێلوێ، بنی ڕەزان و خواجامیر'' بە ئەنجامدانی چالاکیی تەبلیغی بەبۆنەی ٢٥ی گەلاوێژ، سەلماندیانەوە، خەبات و تێکۆشانی بزووتنەوەی کورد بە ڕێبەرایەتیی حیزبی دێموکرات هەروا گەشاوەتر لە جاران بۆ وەدیهێنانی ئامانجەکانی دەڕواتە پێش.
هەروەها ڕۆڵە قارەمانەکانی دێموکرات لە شاری سنە لە شارەک بێعسەت، کۆڵانەکانی شاڵمان، تەپەی کەرباسی و هەروەها لە ناوچەی ژاوەرۆ لە ئاوایی سەرڕێز، بە نووسینی دروشم و تراکتی تایبەت بە ٢٥ی گەلاوێژ و هەروەها بڵاوکردنەوەی وێنەی شەهید مووسا باباخانی پەیمانیان لەگەڵ شەهیدان و حیزبە خۆشەویستەکەیان نوێ کردەوە.
