ئەندامان و لایەنگرانی حیزبی دێموکرات لە چەند شار و ناوچەی ڕۆژهەڵاتی کوردستان، بەبۆنەی ٢٥ی خەرمانان ساڵوەگەڕی شەهیدکرانی ژینا ئەمینی و دەستپێکی شۆڕشی ژینا، سەرەڕای چاوەدێریی چڕی ناوەندە ئەمنییەکانی ڕێژیم بەسەر جموجۆڵی خەڵکدا، چالاکیی تەبلیغییان بەڕێوە برد.
ڕۆژی چوارشەممە ٢٢ی خەرمانانی ١٤٠٢ی هەتاوی، ئەندامان و لایەنگرانی تێکۆشەر و بوێری حیزبی دێموکرات لە شارەکانی پیرانشار، شنۆ، مەهاباد، ورمێ، بۆکان، سەقز و سنە بەبۆنەی ٢٥ی خەرمانان ساڵڕۆژی شەهیدکرانی ژینا ئەمینی و دەستپێکی ڕاپەڕینی گەلانی ئێران دژی ڕێژیمی کۆماری ئیسلامی، سەرەڕای کەشێکی ئەمنییەتیی توند، چالاکیی تەبلیغییان بەڕێوە برد و ئامادەیی خۆیان بۆ بەردەوامبوون لە شۆڕش و مانگرتن و سەرهەڵدان دژی ڕێژیم ڕاگەیاند.
تێکۆشەرانی دێموکرات بە گڕوتینێکی زۆرەوە پێشوازیی خۆیان لە بانگەوازی ٦ حیزب و لایەنی سیاسیی ڕۆژهەڵاتی کوردستان بۆ مانگرتن و چوون بۆ سەر گڵکۆی شەهیدانی شۆڕشی ژینا ڕاگەیاند و بە بڵاوکردنەوەی وێنەی شەهیدانی ڕاپەڕین بەردەوامیی خۆیان لەسەر درێژەدانی ڕێبازی شەهیدان دووپات کردەوە.
ئەندامانی حیزبی دێموکرات هاوکات لەگەڵ ئەو چالاکییانە بەبۆنەی ٢٥ی خەرمانان، بە بڵاوکردنەوەی تراکت و وێنەی دوکتور شەرفکەندی ڕێبەری هەڵکەوتە و گەورەی گەلی کورد، یادی شەهیدانی میکۆنووسیان بەرز ڕاگرت و بۆ جاریکی دیکە تێرۆریزمی کۆماری ئیسلامییان مەحکووم کردەوە.
ئەو شوێنانەی کە چالاکیی تێدا بەڕێوە چووە بریتین لە:
پیرانشار، گوندی خراپە، سەرین چاوێ.
مەهاباد، نێوشار، ناوچەی شاروێران گوندەکانی قجی‌ئاوا، خورخورە و قزڵقۆپی.
شنۆ، ناوچەی دەشتەبێل.
ورمێ، ئاواییەکانی شەیتان‌ئاوا، دەڵۆ، دەربەند و ناوچەی دۆڵ.
سەقز، شارەکی دانیشگا، بلواری دانیشجوو و پردی کەوسەر.
بۆکان، کانی سەیران و قورمیش.
سنە.
