ئۆکراین ٢٢ فڕۆکەی بێفڕۆکەوانی ئێرانیی هەناردەکراوی ڕووسیەی تێک شکاند.
هێزی ئاسمانیی ئۆکراین ڕۆژی یەکشەممە ١٢ی خەرمانانی ١٤٠٢ی هەتاوی ڕایگەیاند کە لە ٢٥ فڕۆکەی هێرشبەری شاهێدی ئێرانیی هەناردەکراوی ڕووسیە ، ٢٢ ی تێکشکاندووە.
بەپێی هەواڵی هەواڵدەریی "ئورووپای ئازاد" بەرپرسانی ئۆکراینی ڕایانگەیاند کە هێرشە یەک لەدوای یەکەکانی ڕووسیە بۆ بەندەری "ئوودسا" بەردەوامە و ئەو سێ فڕۆکەیەی کە هێزی ئاسمانیی ئۆکراین نەیتوانی تێکیان بشکێنێ، بەشێکی بچووک لە ژێرخانی بەندەرەکەی وێران کردووە و دوو کەسیش بریندار بوون.
جێگای ئاماژەیە کە بەندەری ئوودسا یەکێک لەو بەندەرانەی ئۆکراینە کە دانەوێڵەی ئەو وڵاتە کە ٣٠ لەسەدی دانەوێڵەی جیهان بۆ وڵاتانی دیکە پێکدێنێ هەناردە دەکا و پێشتریش ڕووسیە ڕایگەیاندبوو کە ڕێگر نابێ لە هەناردەی دانەوێڵە لەو بەندەرەوە.
لەلایەکی دیکەوە فڕۆکە بێفڕۆکەوانەکانی ئۆکراین بەشێکی بەرچاو لە فڕۆکەخانەکانی ڕووسیەیان بوردومان کرد بە شێوەیەک کە هەموو فڕۆکەخانەکانی ڕووسیە داخران.
