شەوی شەممە ١ی ڕەزبەر، کاک سەید خدر محەممەدی ناسراو بە هەژیر موکریانی، بە نەخۆشیی شێرپەنجە لە نەخۆشخانەیەکی شاری ستۆکهۆڵم ماڵاوایی لە بنەماڵە و هاوسەنگەرانی کرد.
کاک هەژیر، لە دەیەی ٣٠ی هەتاوی لە شاری مەهاباد لەدایک بوو. ساڵی ١٣٥٧ی هەتاوی، لە کاتی بەخاکسپاردنی کاک عەزیز یووسفی، سێ ڕۆژ لەسەر قەبران چالاکانە بەشدار بوو و لە کاتی ڕێپێوانەکەدا، لەگەڵ ژمارەیەکی زۆر دەسبەسەر کران.
ناوبراو لە شەڕی سێ مانگەدا، پێشمەرگە و هاوکاری پەلی شاهۆ لە ناوچەی سەقز بوو و دواتر لە وڵاتی سوید گیرسایەوە.
کاک هەژیر لە ٢٠٠٦ی زایینییەوە ئەندامی حیزبی دێموکرات بووە، لە ساڵی ١٣٩٧ی هەتاوی و دوای مووشەکبارانی بنكە و بارەگاكانی حیزبی دێموكرات، بە فەرمی هاتە نێو تەشکیلاتی حیزبی دێموکرات و لە کۆمیتەی ستۆکهۆڵم سازمان درا.
کاک هەژیر لە بواری سیاسییەوە کەسێکی تێگەیشتوو و زۆر بەهەست و دەروەست بوو و زۆر تامەزرۆی ئازادی بوو.
حیزبی دێموکراتی کوردستانی ئێران، بەبۆنەی کۆچی دوایی کاک سەید خدر محەممەدی، سەرەخۆشی لە بنەماڵە و کەسوکاری ناوبراو دەکات و خۆی بە هاوخەمیان دەزانێت.
