ناوەندی تەشکیلاتی حیزبی دێموکراتی کوردستانی ئێران، داواکارییەکی ڕوو بە خەڵکی ناوچەی سەلاس و پیاوماقوڵانی عەشیرەتی تاوگۆزی، بڵاو کردەوە و داوای کردووە کە بە زووترین کات کۆتایی بە گرژییەکانی نێوانیان بهێنن.
دەقی داواکارییەکە بەم شێوەیەیە:
بەداخەوە تێکهەڵچوونێکی کۆمەڵایەتی لەنێوان دوو بنەماڵەی سەر بە عەشیرەتی تاوگۆزی لە گوندی ڕەجەویی سەر بە ناوچەی سەلاسی باوەجانی، دوو کوژراو و چەند برینداری لێکەوتەوە.
ناوەندی تەشکیلاتی حیزبی دێموکرات وێڕای بەداخبوونی لەم ڕووداوە تاڵە، داوا لە هەردوو بنەماڵە دەکەین بە زووترین کات کوتایی بەو شەڕ و گرژییە بهێنن و لەسەر دەستی پیاوماقووڵ و ڕیشسپییەکانی ناوچەکە، ڕق و کینە هەمبەر بە یەکتر کۆتایی بهێنن، درێژەی ئەو کێشە و ئیختلافانە بە قازانجی ڕێژیمە و دەتوانن کەڵکی خراپی لێ وەربگرن.
حیزبی دێموکراتی کوردستانی ئێران وەک هەمیشە پێداگری لەسەر برایەتی و تەبایی نێوان خەڵک دەکات.
حیزبی دێموکراتی کوردستانی ئێران
ناوەندی تەشکیلات
٥ی ڕەزبەری ١٤٠٢ی هەتاوی
