١٣ ژن و منداڵی ئیسرائیلی و ١٢ کەسی تایلەندی کە لەلایەن حەماسەوە بە دیل گیرابوون ئازاد کران، هەروەها ٣٩ زیندانیی فەلەستینی لە زیندانەکانی ئیسرائیل ئازاد دەکرێن.
دوای دەستپێکردنی ئاگربەست لە شەڕی نێوان ئیسرائیل و حەماس، یەکەم گرووپی بە بارمتەگیراوانی ئیسرائیلی کە لەلایەن حەماسەوە گیرابوون، ڕۆژی هەینی ٣ی سەرماوەز لە لێواری غەززە ڕادەستی ڕێکخراوی خاچی سوور کران.
هاوکات ١٢ شارومەندی تایلەندی کە لەلایەن حەماسەوە ڕفێندرابوون، ئازاد کران و سەرۆکوەزیرانی تایلەند ئازادکردنی ئەو ١٢ کەسەی پشتڕاست کردەوە.
لە بەرانبەردا ٣٩ زیندانیی فەلەستینی لە زیندانەکانی ئیسرائیل ئازاد دەکرێن، دەوترێت ئەم کەسانە ٢٤ ژن و ١٥ کوڕی گەنج لەخۆ دەگرێت.
ئیسرائیل و گرووپی حەماس بە نێوەندگیریی قەتەر و ئەمریکا و میسر، لەبارەی ڕاگرتنی شەڕی چوار ڕۆژە و ئاڵوگۆڕی ٥٠ بارمتەی ئیسرائیلی لەگەڵ ١٥٠ زیندانیی فەلەستینی گەیشتوونەتە ڕێککەوتن.
