ڕۆژی هەینی، ١٩ی خەزەڵوەر، مەولەوی عەبدولحەمید، پیشنوێژی مزگەوتی مەکیی زاهێدان، لە وتارەکەی خۆیدا باسی لە نەبوونی ئازادیی میدیاکان لە ئێراندا کرد و وتی: ئێمە وەکوو پەیڕەوانی مەزهەبی سوننە، هیچ میدیایەکمان نییە.
ناوبراو لەم وتارەدا وێڕای ئاماژە بە فیلتێرکرانی ماڵپەڕەکەی خۆی، وتی: ڕێگەچارەی لاوازییەکان و کێشەکان، گوێگرتن لە قسەی ڕەخنەگرانە.
مەولەوی عەبدولحەمید لە بەشێک لە وتارەکەیدا ڕایگەیاند: ئەو میدیایانەی کە سەر بە دەوڵەت و ساختاری دەوڵەتن، هەوڵی وەپاڵدانی تۆمەتی درۆ و پڕوپاگەندە دژی ڕەخنەگران دەدەن.
ناوبراو لە درێژەدا ئاماژەی بە سەرکوتی ئازادیی ڕادەربڕین لە ئێراندا کرد و وتی : ئازادیی ڕادەربڕین و ئازادیی قەڵەم پێویستە و بە قازانجی خەڵکە و دەسەڵات دەبێ ڕۆژنامەوانانی زیندانی، ئازاد بکات.
