ڕۆژی شەممە ١٨ی سەرماوەز، هەڵمەتی زاگرۆسانە بە چاندنی تۆوی بەڕوو لە شاخەکانی دەروبەری ئاوایییەکانی نگڵ، دانیکەش و خۆبەخشان و لەلایەن کۆمیتەی دێکانی ئەنجومەنی سەوزی چیا و به بەشداریی خەڵکی ئەم ئاواییانە بەڕێوەچوو.
ئەم هەنگاوە پڕ بایەخە لەلایەن گەورە و بچووکی ئاواییەکانەوە وەکوو خولقێنەرانی داهاتووی ئەم نیشتمانە، پێشوازییەکی بەرچاوی لێ کراوە.
ئەم هەنگاوە لە چەندین ناوچە و دەڤەری کوردستان بە مەبەستی بەکەلتوورکردنی بابەتی ژینگەپارێزی و هەروەها بەرگری و بەگژداچوونی دیاردەی نگریسی تاڵانکردنی دارستانەکان بەڕێوە دەچێت و تا ئێستا نزیک بە ١٠٠ ڕێکخراوی ژینگەپارێزی، شاخەوانی و مەدەنی، هەڵمەتی زاگرۆسانەیان لە سەرانسەری ڕۆژهەڵاتی كوردستان بەڕێوە بردووە.
زاگرۆسانە هەڵمەتێکە، کە ماوەی پێنج ساڵە لە سەرانسەری زاگرۆسدا و بەمەبەستی بووژانەوەی بەشێک لەو دارستانانەی کە کەوتوونەتە بەر پەلاماری ئاگر و تاڵانچییەکانی دارستان و زەوی‌خۆرەکان بەڕێوە دەچێت.
