ڕۆژی دووشەممە ٢٧ی سەرماوەزی ١٤٠٢ی هەتاوی، دایە نوسرەت سدیقی کچی میزرا حەسەن و دایکی شەهید عەزیز حوسێنی، ناسراو بە ''عەزیز هەڵۆیی'' بەهۆی جەڵتەی مێشک و لە تەمەنی ٨٠ ساڵیدا لە شاری بانە کۆچی دوایی کرد.
دایە نوسرەت ژنێکی نیشتمانپەرەوەر و دڵسۆز بوو و هەمیشە شانازیی بە کوڕەکەیەوە دەکرد کە لە ڕێگەی ئازادی و سەربەستی خاک و گەلەکەیدا شەهید بووە.
ناوبراو دوای شەهیدبوونی کوڕەکەی و لە ڕێوڕەسمی پرسە و سەرخۆشییەکەیدا لەنێو ئاپۆڕای خەڵکدا بە ورەیەکی بەهێزەوە بە خەڵکی وتووە کەس خەمی کوڕی منی نەبێت، کوڕی من لە ڕێبازێکی پڕ لە شانازیدا شەهید بووە و بۆ کوردستان گیانی خۆی بەخت کردووە و من پێی سەربەرزم.
شەهید عەزیز بەهاری ساڵی ١٣٦٣ی هەتاوی لە شەڕێکی قارەمانانە دژی ڕێژیم و لە پشتی گوندی شێنان شەهید بوو و پەیوەست بە کاروانی نەمرانی حیزب و گەلەوە بوو.
حیزبی دێموکراتی کوردستانی ئێران بەو بۆنەوە سەرەخۆشی لە بنەماڵە و خزم و کەسوکاری ناوبراو دەکات و خۆی بە هاوبەشی خەمیان دەزانێت.
