ڕۆژی چوارشەممە، ٢٩ی سەرماوەز، کاک ئیبراهیم زولفەقاری، ناسراو بە برایم عەینە، ئەندامی حیزب و کەسایەتیی ناوداری شارەکانی شنۆ و نەغەدە، بە هۆی نەخۆشییەوە، لە نەخۆشخانەیەکی تاران و لە تەمەنی ٨٢ ساڵیدا، کۆچی دوایی کرد.
کاک برایم هەر لە سەرەتاکانی شۆڕشی گەلانی ئێرانەوە وەک ئەندامێکی هەڵسووڕ و چالاکی حیزبی دێموکرات دژ بە سیاسەتی ئاخوندەکان وەستاوەتەوە و هەڵوێستی توندی هەبووە.
ناوبراو بە لەقاودانی پیلانە دژی گەلییەکانی ئاخوندەکان بەتایبەت حەسەنی ئیمام جومعە و نوێنەری خومەینی لە ورمێ و پاسدار مەعبەدی بۆ ئاژاوەنانەوە لە نێوان دوو نەتەوەی کورد و ئازەریی ئەو ناوچەیەدا، هەڵوێستی هەبووە.
کاک برایم ئەرکی پێئەسپێردراوی حیزبیی بە دڵسۆزی و هەست بە بەرپرسایەتییەوە دەگرتە ئەستۆ و بەڕێوەی دەبرد.
برازایەکی کاک برایم بە ناوی حەبیبوڵڵا ذولفەقاری، لە ڕێگای گەیشتن بە ئامانجەکانی گەلدا شەهید بووە و چووەتە ڕیزی کاروانی نەمرانی گەلەوە.
تەرمی کاک برایم لەنێو ئاپۆڕای خەڵکی نیشتمانپەروەری شاری نەغەدە و لە گۆڕستانی کوردانی ئەو شارە بە خاک سپێردرا.
حیزبی دێموکراتی کوردستانی ئێران بەم بۆنەوە سەرەخۆشی لە بنەماڵە و خزم و کەسوکاری ناوبراو دەکات و خۆی بە هاوبەشی خەماین دەزانێت.
