لە درێژەی کۆبوونەوە ناڕەزایەتییەکانی توێژە جیاجیاکان لە کوردستان و ئێران، ڕۆژی ڕابردوو لانیکەم ٩ کۆبوونەوەی ناڕەزایەتی لە شارە جیاوازەکانی ئێران بەڕێوە چوو.
بەپێی ڕاپۆرتی هەواڵدەریی هێرانا، ڕۆژی سێشەممە ٥ی بەفرانبار، ژمارەیەک لە فەرمانبەرانی شارەداریی تاران لە بەردەم بینای شارەداریی ئەم شارە و کۆمەڵێک لە خانەنشینکراوان لە ئەهواز و کرماشان کۆبوونەوەی ناڕەزایەتییان بەڕێوە برد و خوازیاری ڕەچاوکردنی داواکارییەکانیان بوون.
کۆمەڵێک لە کرێکارانی کارخانەی پۆڵاسازی لە ئەهواز بۆ چوارەمین ڕۆژ نەچوونە سەر کارەکەیان و کۆبوونەوەی ناڕەزایەتییان بەڕێوە برد. هاوکات کۆمەڵێک لە زێرفڕۆشەکان لە تاران و ئەردەبێڵ و ژمارەیەک لە کرێکارانی شیرکەتی گەشەپێدانی پیشەسازی بیرینگی ئێران لە تەورێز مانیان گرت.
ڕۆژی دووشەممە ٤ی بەفرانبار، کۆمەڵێک لە خانەنشینکراوانی موخابرات لە بەردەم بیناکانی ئیدارەی موخابرات لە بۆروجێرد و بۆجنوورد ناڕەزایەتییان دەربڕی.
ناڕەزایەتیی ئەو توێژانەی کۆمەڵگا بۆ 'گوێنەدان بە داواکارییەکان، خراپی بارودۆخی ژیان، زیادنەکردنی مووچە و نەبوونی خزمەتگوزاریی خۆشگوزەرانی، کێشەی بیمەی دەرمانی و چەندین کێشە و گرفتی دیکە' دەگرێتەوە کە هەتا ئێستا لەلایەن ناوەندە پێوەندیدارەکانی ڕێژیمەوە نە تەنیا ئاوڕێکیان لێ نەدراوە، بەڵکوو لە هێندێک حاڵەتدا ناڕازییان سەرکوت کراون.
