بەپێی هەواڵە بڵاوکراوەکان، لە زانکۆی تەورێزدا، کۆمیتەیەکی نوێ بە ناوی (ئێفاد)، بە مانای هەوڵی فەرهەنگی کۆمەڵایەتیی زانکۆ، دامەزراوە.
بە وتەی خوێندکارانی ئەم زانکۆیە، ئەم کۆمیتەیە لەلایەن حەراسەتی زانکۆکانەوە دامەزراوە و بە ناردنی کورتەنامە بۆ خوێندکارە کچەکان داوایان لێ دەکات کە بۆ کۆنترۆڵکردنی حیجاب و شێوازی پۆشینی جلوبەرگەکانیان سەردانی ئەو ناوەندە بکەن.
بەپێی زانیارییەکان، شوێنی دیاریکراو و ئەو کەسانەش کە لە شوێنەکان بۆ کۆنتڕۆڵکردنی حیجابی کچانی خوێندکار جێگیر کراون، وەک یەک نین و خوێندکاران هەرجارەو بانگی شوێنێکی جیاواز دەکرێن.
هەر لەم پێوەندییەدا و لە ماوەی ڕۆژانی ڕابردوودا، جێگری ڕاوێژکاری زانکۆی تاران بە ئێکاونتی تایبەتی خۆی و بە بیانووی ئاگادارکردنەوەی خوێندکارانی کچ لە جۆری جلوبەرگیان کورتەنامەی بۆ ناردوون.
کاربەدەستانی ڕێژیم لە زانکۆکان، لە ڕێگەگەلی جیاوازە گوشار دەخەنە سەر خوێندکاران و بە بەزاندنی "سنووری تاکەکەسی" دەستێوەردان لە کاروباری خوێندکاراندا دەکەن.
لە سەرهەڵدانی ژن، ژیان، ئازادیدا زانکۆکان مەتەرێزێکی گرینگی بەرخودان و هەستانەوە دژی ڕێژیمی ئێران بوون و خوێندکاران ڕۆڵێکی تایبەتیان لەم سەرهەڵدانەدا لەئەستۆ گرت.
گوشارەکانی بەرپرسانی ڕێژیم بۆ سەر خوێندکاران، بە مەبەستی کۆنتڕۆڵکردنی دۆخەکە و پێشگرتن بە دووبارەبوونەوەی چالاکییە خوێندکارییەکان لە چوارچێوەی شۆڕشی ژینادایە.
