هەواڵدەری تەسنیم سەر بە سپای پاسداران ڕۆژی سێشەممە ١٤ی سەرماوەز لە زاری باڵوێزی ئێران لە نەتەوە یەکگرتووەکان ڕایگەیاند کە ئێران لە هیچ یەک لە هێرشەکان بۆ سەر هێزەکانی ئەمریکا لە ناوچەکە دەستی نەبووە.
ئەم لێدوانەی ئەمیرسەعید ئیرەوانی کاردانەوەیەک بە قسەکانی جەیک سالیوان ڕاوێژکاری ئاسایشی نیشتمانیی ئامریکا بوو، کە ڕۆژی دووشەممە ١٣ سەرماوەز لە پرێس کۆنفرانسێکدا ڕایگەیاندبوو هێرشی چەکدارانی حووسی بۆ سەر کەشتییەکانی ئەمریکا لە دەریای سوور بە پشتیوانیی ئێران ئەنجام دەدرێت.
هەر لەم پێوەندییەدا فەرماندەیی ناوەندیی ئەمریکا "سێنتکام"، ڕۆژی ڕابردوو باسی لە ٤ هێرشی میلیشیاکانی سەر بە ڕێژیم بۆ سەر سێ کەشتیی بارهەڵگر کرد و ڕێژیمی ئێرانی بە بەرپرسیاری ئەو هێرشانە زانی.
هێرشی حووسییەکانی یەمەن بۆ سەر کەشتییە بارهەڵگرەکان دوای شەڕی حەماس و ئیسرائیل دەستی پێکرد.
