ڕۆژی هەینی، ١٠ی سەرماوەز، ژمارەیەکی بەرچاو لە ژینگەپارێزان و ژینگەدۆستان لە ئاوایی مەحمەشەی سەرێی ناوچەی سندووس، لە دەڤەری بانە و هەروەها لە شارۆچکەی حەسەناوای سنە، هەڵمەتی زاگرۆسانەیان بەڕیوە برد.
لەم هەڵمەتەدا، چالاکانی ژینگە لە سنە بە ناشتنی دەنکە بەڕوو، لە ناوچەی سندووس بە ناشتنی ٢٠ هەزار دەنکە بەڕوو و دوو هەزار دەنکە گوێز و بادام و گێوژ، بەشدارییان لە هەڵمەتی زاگرۆسانەی ئەمساڵدا کرد.
لە هەڵمەتی زاگرۆسانەی ئەمساڵی بانەدا، گرووپە شاخەوانییەکان و ئەنجومەنی پاژین، ڕۆڵێکی بەرچاویان هەبوو.
هەڵمەتی زاگرۆسانەی ئەمساڵ لە ڕۆژی ٤ی سەرماوەزدا و لە گوندی سیاناوی مەریوانەوە دەستی پێکرد.
لەو چالاکییەدا کە بە بەشداریی بەرچاوی لاوان و منداڵان بەڕێوە دەچێت، ساڵانە هەزار چڵ نەمام پێشکەش بە خاک و دارستانەکانی کوردستان دەکرێن.
زاگرۆسانە هەڵمەتێکە، کە ماوەی پێنج ساڵە لە سەرانسەری زاگرۆسدا و بەمەبەستی بووژانەوەی بەشێک لەو دارستانانەی کە کەوتوونەتە بەر پەلاماری ئاگر و تاڵانچییەکانی دارستان و زەوی‌خۆرەکان بەڕێوە دەچێت.
