خەڵکی زاهێدان لە درێژەی کۆبوونەوە ناڕەزایەتییەکانیاندا، ڕۆژی هەینی بە وتنەوەی دروشم لە دژی ڕێژیمی ئێران و پاکستان، ڕێپێوانیان کرد.
بەپێی ڕاپۆرتی ''حاڵ‌وەش''، ڕۆژی هەینی ٢٩ بەفرانبار، خەڵکی زاهێدان لە دوای نوێژی هەینی و لەحاڵێکدا کە کەشێکی ئەمنییەتی بەسەر شارەکەدا زاڵ بوو، ڕێپێوانیان کرد.
هێزەکانی ڕێژیم لە بەرەبەیانیی ڕۆژی هەینییەوە لە دەوروبەری مزگەوتی مەکی و شەقامەکانی دەوروبەری جێگیر ببوون و پشکنینی خەڵکیان دەکرد.
بەپێی ئەو ڕاپۆرتانە، هاووڵاتییانی بەلووچ لە شاری زاهێدان دوای نوێژی هەینی و بە نیشانەی ناڕەزایەتیدەربڕین بەرانبەر بە هێرشە مووشەکییەکانی پاکستان و ئێران لە ناوچە سنوورییەکانی بەلووچستان دژی ڕێژیمی کۆماری ئیسلامی ئێران و پاکستان دروشمیان دا و ناڕەزایەتییان دەربڕی.
ڕۆژی سێشەممە ٢٦ی بەفرانبار، میدیاکانی سەر بە سپای پاسداران ڕایانگەیاند کە کۆماری ئیسلامی لە هێرشێکدا بە مووشەک و دڕۆن پێگەکانی گرووپی جەیشولعەدلی لە پاکستانی کردووەتە ئامانج.
حکوومەتی پاکستان لە بەیاننامە نوێیەکەیدا بەتوندی هێرشەکەی ڕێژیمی ئێرانی مەحکووم کرد و ڕایگەیاند کە دوو منداڵی بێتاوان لەم هێرشەدا کوژراون و سێ کچیش بریندار بوون.
بەرپرسێکی ئەمنیی پاکستان ڕۆژی پێنجشەممه به هەواڵدەریی ''سی ئێن ئێن''ی ڕاگەیاند، ئەرتەشی ئەو وڵاتە بە مەبەستی تۆڵەکردنەوە، ٧ شوێنی لە خاکی ئێراندا کردووەتە ئامانج.
