ئەرتەشی ئیسرائیل بەرەبەیانیی ئەمڕۆ دووشەممە ٢٣ی ڕێبەندان دەسپێکی هێرش بۆ سەر شاری ڕەفەحی ڕاگەیاند.
نووسینگەی سەرۆکوەزیرانی ئیسرائیل ڕایگەیاندووە لە ئێستادا ٤ گرووپی حەماس لە ڕەفەحدا جێگیرن و تا کاتێک کە ئەو گرووپانە لەوێ بن ئیسرائیل ناتوانێت بە ئامانجی خۆی واتە بنبڕکردنی ئەم گرووپەی سەر بە کۆماری ئیسلامیی ئێران بگات.
ئەرتەشی ئیسرائیل بەرەبەیانیی ئەمڕۆ لە چەند هێرشی ئاسمانیدا بنکە و بارەگاکانی حەماسی لە ڕەفەح کردووتە ئامانج.
ڕۆژنامەی تایمزی ئیسرائیل لە زاری وەزارەتی تەندروستیی غەززەوە ڕایگەیاندووە لەم هێرشانەدا نزیک بە ١٠ کەس کوژراون و ژمارەیەکی دیکەش بریندار بوون.
جۆ بایدێن سەرۆککۆماری ئەمریکا لە وتووێژێکی تەلەفۆنیدا لەگەڵ نێتانیاهوو جەختی کردووەتەوە کە پێویستە ئیسرائیل بەرنامەیەکی بڕواپێکراوی بۆ ئەمنییەت و پاراستنی یەک ملیۆن ئاوارەی فەلەستینی کە بە ناچاری چوونەتە ڕەفەح، هەبێت.
هەروەها میسر هۆشداری داوەتە ئیسرائیل کە لە ئەگەری گواستنەوەی بەکۆمەڵی فەلەستینییەکان بۆ خاکی ئەو وڵاتە، ڕێککەوتننامەی ئاشتی و پێوەندییە ئەمنییەکانی دوو وڵات دەکەوێتە مەترسییەوە.
هاوکات سەرۆکوەزیرانی ئیسرائیل لە وتووێژێک لەگەڵ کاناڵی "ئەی بی سی" ڕەخنەی لە داواکارییەکان لە ئیسرائیل بۆ هێرش نەکردنەسەر ڕەفەح گرت و ڕایگەیاند: ئەوانەی کە داوا ئەکەن ئێمە نەچینە نێو ڕەفەحەوە، لە ڕاستیدا دەڵێن کە ئیسرائیل شکست بخوات و حەماس لەوێدا بپارێزرێت.
شاری ڕەفەح دەکەوێتە باشووری ناوچەی غەززە و هاوسنوورە لەگەڵ وڵاتی میسر کە لە پاش دەسپێکی شەڕ و کۆچی خەڵک لە باکووری غەززەوە بۆ ئەوێ، بووەتە شوێنی نزیک بە یەک ملیۆن کەس لە ئاوارەکانی شەڕ.
شەڕی ئیسرائیل و حەماس پاش هێرشی تێرۆریستیی ١٥ی ڕەزبەری چەکدارانی حەماس کە لەلایەن ئێرانەوە پشتیوانییان لێدەکرێت، دەستی پێ کرد.
