لە ڕۆژانی ڕابردوودا کاک حه‌سه‌ن ئه‌شعه‌ری، شاعێر و وەرگێر و چالاکی سیاسیی خەڵکی نەغەدە، بە هۆی نەخۆشییەوە، لە تەمەنی ٦۱ ساڵیدا ماڵاوایی لە ژیان کرد.
کاک حه‌سه‌ن کەسایەتییه‌كی چالاک و دیاری ئه‌دەبی و سیاسیی ناوچەکە بوو.
ناوبراو مرۆڤێکی نیشتمانپەروەر و خۆنەویست بوو کە بە درێژایی تەمەنی ڕۆڵێکی بەرچاوی لە تێگەیاندن و پێگەیاندنی ئەدیبانی نەغەدە هەبووە و ڕێنیشاندەرێکی بەوەفا و دڵسۆز بۆ لاوانی ناوچەکە سەبارەت بە دۆزی ڕەوای گەلەکەمان بوو.
کاک حەسەن سەرەڕای بارودۆخی نالەباری ژیانی، بە دەیان جار یارمەتیی خەباتکارانی کوردی دابوو و گیانی خۆی لەپێناو پاراستن و ڕزگارکردنی ڕۆڵەکانی تێکۆشەری خاک و نیشتمان خستبووە مەترسییەوە. هەر بەم هۆیەوە لە ساڵانی دەیەی ٨۰ی هەتاویدا دەسبەسەر کرا و کەوتە بەر ئەشکەنجەی هێزەکانی ڕێژیمی داگیرکەری ئێران.
حیزبی دێموکراتی کوردستانی ئێران، بەم بۆنەوە سەرەخۆشی لە بنەماڵە و خزم و کەسوکاری ناوبراو دەکات و خۆی بە هاوبەشی خەمیان دەزانێت.
