ڕۆژی چوارشەممە ٢٥ی ڕێبەندان، محەممەد فەقێ عەلی بەرپرسی پێوەندییە نێونەتەوەییەکانی حیزبی دێموکراتی کوردستانی ئێران لە وڵاتی ئوتریش لە دیدارێکدا لەگەڵ دوکتور هێلموت براندشتێتەر ئەندام پارلمانی حیزبی لیبرال دیموکراتی ئوتریش و هەروەها دکتۆر تۆماس یاندڵ ڕاوێژکار بۆ کاروباری دەرەوە، لە کلوبی پارلمانتارانی ئەو حیزبە کۆ بووە.
لەو دیدارەدا پرسی کورد بە گشتی و کورد لە ئێراندا بە تایبەتی هەروەها چاوڕوانییەکانی کورد و حیزبی دێموکراتی کوردستانی ئێران لە ئەندامانی داهاتووی پارلمانی ئورووپا و چەندین بابەتی دیکە قسە کرا.
لە درێژەی ئەم دانیشتنەدا، محەممەد فەقێ عەلی ئاوڕێکی لە ڕۆڵی کورد لە ئێران دا و باسی لە شۆڕشی ''ژن، ژیان، ئازادی'' ڕۆڵی بەچاوی کورد و سەرکوتکارییەکانی ڕێژیمی ئێران کرد.
لەم دانیشتەندا نوێنەری حیزب چەند داواکاریەکی پێشکەش بە دوکتور براندشتێتەر و دوکتور تۆماس یاندڵ کرد کە بریتی بوون: ''پشتوانیی لە گەڵی کورد، هەوڵدان بۆ ئەوەی کە کۆماری ئیسلامی دەست لە ئێعدامکردن هەڵبگرێت، سپای پاسداران بخرێتە لیستی تێرۆری وڵاتانی یەکیەتیی ئورووپاوە و هەوڵی کۆنترۆڵکردن و پشکنینی بەشی هەرە زۆری کارخانەجاتەکان کە لەلایەن ئێرانییەکانەوە دامەزراون.
لە کۆتایدا هەریەک لە دوکتۆر براندشتێتەر و دوکتۆر یاندڵ خۆشحاڵیی خۆیان لەو سەردانەی نوێنەری حیزبی دێموکرات دەربڕی، هیواداریان خواست کە هەردوو حیزبی دیمۆکرات و لیبراڵ دیمۆکراتەکانی ئوتریش زیاتر لە ئاڵوگۆڕی زانیارییەکان لەگەڵ یەکتر کەڵک وەرگرن. هەروەها بەڵینیان دا کە لە چوارچێوەی دەسەڵاتی کاری خۆیاندا هەموو هەوڵێک بۆ جیبەجێکردنی خاڵە پێشنیاریەکان دەدەن.
