کۆمپانیای مایکرۆسافت لە ڕاپۆرتێکدا باسی لە کەڵکوەرگرتنی هاکێرەکانی ئێران، چین، ڕووسیە و کۆرەی باکوور لە ژیریی دەستکردی ئەو کۆمپانییە کردووە.
بەپێی ڕاپۆرتی کۆمپانی مایکرۆسافت، هاکێرە دەوڵەتییەکانی ئەو چوار وڵاتە لە ژیریی دەستکردیی مایکرۆسافت، بە مەبەستی چالاکیی سیخوڕی بۆ ئەرتەشی ڕووسیە و سپای پاسداران و ناوەندە دەوڵەتییەکانی چین و کۆرەی باکوور، کەڵکیان وەرگرتووە.
لە درێژەی ئەم ڕاپۆرتەدا هاتووە کە سپای پاسدارانی ئێران لە ژیریی دەستکرد کەڵکی وەرگرتووە تاکوو دژبەران و ناڕازییان بخاتە نێو داوی خۆیەوە.
هاکێرەکانی سەر بە سپای پاسداران لە ئامێری "ئۆپێن ئەی ئای" بۆ ناردنی ئیمەیل و نامەهایەک کەڵکیان وەرگرتووە کە نێوەڕۆکێکی خڵەتێنەریان هەبووە.
بەپێی ئەم ڕاپۆرتە لە نموونەیەک لەم نامانەدا چەند چالاکی ژن و فێمێنیستی ناودار کێشراونەتە نێو ماڵپەڕێکەوە کە وەکوو داو بەکار هێنراوە.
پاش بزووتنەوەی ژن ژیان ئازادی و ڕۆڵی سەرەکیی ژنان لەو بزووتنەوەیەدا، ڕێژیم بە شێوازی جۆراوجۆر و بەردەوام لە هەوڵی لەداوخستن و دەسبەسەرکردنی ژنانی چالاک و دژبەری ڕێژیم بووە.
