لە دووهەمین هێرشی ئەمریکا بۆ سەر گرووپە میلیشیاکانی سەر بە ڕێژیمی ئێران لە ناوچەکەدا، هێزی ئاسمانیی ئەمریکا لە زەنجیرە هێرشێکدا بنکەکانی سەر بە ڕێژیمی ئێرانی لە یەمەن بۆمباران کرد.
هەواڵدەریی ڕۆیتێرز، لە زاری دوو بەرپرسی ئەمریکاوە بڵاوی کردەوە، لە قۆناغی دووەمی وڵامدانەوەی فرە لایەنی ئەمریکا و هێرش بۆ سەر گرووپە میلیشیاکانی سەر بە ڕێژیمی ئێران لە ناوچەکە، شەوی شەممە ١٤ی ڕێبەندان لە ٣٦ی هێرشی ئاسمانی، ١٣ بنکەی سەر بە ڕێژیمی ئێران و گرووپی حوسییەکان لە سەنعای پێیتەختی یەمەن کرانە ئامانج.
میدیاکانی سەر بە حوسییەکان لە تۆڕە کۆمەڵایەتییەکان بڵاویان کردەوە، شەوی شەممە، هێرشەکانی ئەمریکا و بریتانیا هەردوو ناوچەی "ئەلنەهدین" و "عەتان"یان لە باشووری پێیتەختی یەمەن کردە ئامانج.
جێگەی ئاماژەیە کە شەوی هەینی و لە قۆناغی یەکەمدا، ئەمریکا زیاتر لە ٨٥ بنکەی سەر بە سپای پاسداران و گرووپە میلیشیاکان لە سووریە و عێراقی کردە ئامانج و بەپێی زانیارییەکان نزیکەی ٤٠ کەس لەو هێرشانەدا کوژران.
