تۆڕی یەکگرتوویی بۆ مافی مرۆڤ لە ئێران کە لە ٢٤ گرووپ و ڕێکخراوی ماڤی مرۆیی پێکهاتووە، لە بەرەبەرەی ٨ی مارس ڕۆژی جیهانیی ژندا، لە بەیاننامەیەکدا داوای ئازادکردنی ژنانی بەندکراو لە ئێرانی کردووە.
لەم ڕاگەیەندراوەدا کە لەلایەن ناوەندی مافی مرۆڤی کوردستان و چەند گرووپ و لایەنی دیکەی مافی مرۆییەوە واژۆ کراوە، بە ئاماژەدان بە بەرزڕاگرتنی ١١٣ـهەمین یادی ڕۆژی جیهانیی ژن، خوازیاری ئازادیی دەستبەجێ و بێمەرجی هەموو ژنانی بەندکراو لە ئێراندا بووە.
بەرزنرخاندنی ئەم ڕۆژە لەلایەن ژنانی کورد و ئێرانییەوە لەحاڵێکدایە کە ڕێژیمی ئێران ئەم ڕۆژە بە فەرمی ناناسێت و بەردەوام ژنانی چالاک و خەباتگێڕ کە بۆ مافە ڕەواکانیان هەوڵ ئەدەن، دەخاتە ژێر گوشار و لێپرسینەوە و سزادانەوە.
لە درێژەی بەیاننامەکەدا وێڕای بەرزنرخاندنی خەباتی ژنان لە بزووتنەوەی "ژن، ژیان، ئازادی"دا هاتووە سەرەڕای هەموو گوشارەکانی حکوومەت، دەنگی ئازادیخوازی و یەکسانخوازی ژنان و کچان بە گەشەکردنی ئەم بزووتنەوە لە سەرانسەری جیهاندا دەنگی دایەوە و ژنانی خەباتگێڕی هەموو جیهانی لەگەڵ خەباتی ژنان ئێران، هاودەنگ کرد.
لە بەشێکی دیکەی بەیاننامەکەدا هاتووە: چیرۆکی خۆڕاگری و بوێریی ژنانی وەک زەینەب جەلالیان، سپیدە قۆلیان و هەزران ژنی نەناسراوی دیکە، بۆ گەیشتن بە جیهانێکی بێ هەڵاواردن، لە هەموو جیهاندا دەنگی دایەوە.
لە کۆتایی بەیاننامەکەدا یادی هەموو شەهیدکراوانی بزووتنەوەی ژینا بەرز نرخێندراوە و جەخت کراوەتەوە کە خەباتی ژنان لە ئێران هەرگیز کچانی بوێری خۆی وەک ژینا ئەمینییەکان، ئارمیتاکان و هەزارانی دیکە لە یاد ناکات.
