ڕۆژی چوارشەممە، ٨ی ڕەشەمەی ١٤٠٢، کاک مەنووچێهر کەیخوسرەوپوور، چیرۆکنووسی بەتوانای خەڵكی کرماشان و مامۆستای خانەنشینکراوی پەروەردە و بارهێنان و نیشتەجێی شاری سنە بە هۆی نەخوشییەوە ماڵاوایی لە ژیان کرد.
مامۆستا مەنووچێهر، ماوەی ٣٠ ساڵ هاوکاری نزیکی ئەنجومەنە ئەدەبییەکانی وەک مەولەوی کورد لە شاری سنە بوو.
ناوبراو مرۆڤێکی خوێندەوار بوو و هەمیشە هەوڵی دەدا چیرۆکنووسەکان کۆ بکاتەوە و خزمەتی زیاتر بە بواری چیرۆک و بەتایبەت ئەدەبی چیرۆکی کوردی بکات.
مامۆستا مەنووچێهر کەیخوسرەوپوور، ئەندامیکی چالاک و بەتوانای ئەنجومەنی ئەدەبی و فەرهەنگیی لووتکەی ئومید لە شاری سنە بوو.
حیزبی دێموکراتی کوردستانی ئێران بەم بۆنەوە، سەرەخۆشی لە خزم و کەسوکاری ناوبراو دەکات و خۆی بە هاوبەشی خەمیان دەزانێت.
