شەوی ٢٢ی ڕەشەمە، وەستا محەممەد مەحموودنژاد کوڕی حاجی شەخسە ناسراو بە وەستا حەمە، کەسایەتییەکی خەمخۆر و حیزبدۆست بەهۆی نەخۆشییەوە لە شاری سەردەشت ماڵاوایی لە ژیان کرد.
وەستا حەمە کەسێکی نیشتمانپەروەر و حیزب خۆشەویست بوو و لە هەمانکاتدا خۆشەویستی خەڵکی سەردەشت بوو.
ناوبراو کەسێکی دڵسۆزی و خەمخۆر بۆ حیزبەکەی بوو و بەردوام دژایەتیی جاش و خۆفرۆشەکانی دەکرد.
وەستا حەمە وەستا میکانیکی ماشین و ماتۆر بەرق بوو و لە بەرامبەر کارەکەی بۆ خەڵک کەسێکی بەئینساف و بەبەزەیی بوو؛ لە کاتی هێرشی بەکرێگیراوانی کۆماری ئیسلامی بۆ سەر کوردستان، وەستا حەمە هاوکارێکی دڵسۆز بۆ حیزبەکەی بوو و لە هەموو ناوچەکانی سەردەشت و ڕەبەت هەرکات ماشین و تۆپخانەکانی حیزب تووشی کیشە دەبوون وەستا حەمە تەنیا کەسێک بوو کە فریای حیزب دەکەوت و دەزگا و ماشینەکانی چاک دەکردنەوە، ئەمە لەحاڵێکدا بوو کە گەڕانەوەشی بۆ نێوشار مەترسیی ئاشکرابوونی هەبوو.
ناوبراو هەتا دوایین ساتەکانی ژیانی بەهیوای سەرکەوتنی حیزب و گەڕانەوەی پێشمەرگە بۆ نێو خەڵک بوو.
ناوەندی ڕاگەیاندنی حیزبی دێموکراتی کوردستانی ئێران بەم بۆنەوە سەرەخۆشی لە بنەماڵە و خزم و کەسوکاری ناوبراو دەکات و خۆی بە هاوبەشی خەمیان دەزانێت.
