ڕۆژی شەممە، ١١ی خاکەلێوە، ئەندامێکی حیزبی دێموکرات بە ناوی کاک عوسمان شکاری لە تەمەنی ٧٠ ساڵیدا و بە هۆی نەخۆشییەوە کۆچی دوایی کرد.
کاک عوسمان ئەندامی دێرینی حیزبی دێموکرات بووە و لە ساڵەکانی دەیەی ٦٠ی هەتاویدا بۆ ماوەی چەند ساڵ لەلایەن هێزەکانی ڕێژیمەوە دەسبەسەر کراوە و لە بەندیخانەکانی ڕێژیمدا بووە.
باوکی کاک عوسمان بە ناوی خدر حایز، پێشمەرگەی سەردەمی کۆماری کوردستان بووە.
برایەکی کاک عوسمان بە ناوی خالید شکاری، پێشمەرگەی حیزبی دێموکرات بووە و چووەتە ڕیزی کاروانی نەمرانی گەلەوە.
شەهید خالید شکاری لە ساڵی ١٣٣٢دا لە دوورگەی داشخانە لە دایک بووە و لە ١٥ی خەرمانانی ساڵی ١٣٥٩ی هەتاویدا، لە تێکهەڵچوون لەگەڵ هێزە دژیگەلییەکانی ڕێژیم لە شوێنێک بە ناوی داشکستان شەهید بووە.
کاک عوسمان ئەندامێکی دڵسۆز و ماندوونەناسی حیزبی دێموکرات بووە و ئەرکە پێ ئەسپێردراوەکانی لەوپەڕی هەست بە بەرپرسایەتیدا جێبەجێ کردووە.
ناوبراو هەتا دوایین ساتەکانی ژیانی وەفادار بە ڕێبازی دێموکرات مایەوە.
تەرمی ناوبراو هەمان ڕۆژ لەنێو ئاپۆڕای خەڵکی ناوچەکەدا و بە ئاڵای کوردستانەوە ڕەوانەی گۆڕستان کرا و بە خاک ئەسپێردرا.
ناوەندی ڕاگەیاندنی حیزبی دێموکراتی کوردستانی ئێران بەم بۆنەوە سەرەخۆشی لە بنەماڵە و خزم و کەسوکاری ناوبراو دەکات و خۆی بە هاوبەشی خەمیان دەزانێت.
