ڕۆژی دووشەممە، ١٤ی ڕەشەمە، کۆمەڵێک لە دووکاندارانی شاری بانە، بە نیشانەی ناڕەزایەتیدەربڕین بە داخرانی سنوورەکان لە بەردەم فەرمانداریی ئەو شارە کۆ بوونەوە و خوازیاری کردنەوەی سنوورەکان بوون.
بەپێی زانیارییەکان سنوورەکان ماوەی مانگ و نێوێکە لەلایەن ڕێژیمەوە داخراون و ئەمە زیانێکی زۆری بە دووکانداران و کاسبکارانی ئەم شارە گەیاندووە.
شاری بانە یەکێک لە شارە سنوورییەکانی ڕۆژهەڵاتی کوردستانە کە بەتایبەت لە ڕۆژانی کۆتایی ساڵ و ماوەی نەورۆزدا، گەشتیارێکی زۆر سەردانی دەکەن و بەشێکی زۆر لە داهاتی ئەم دووکاندار و کاسبکارانە لە ڕێگەی کڕین و فرۆشتنی کاڵا و شتومەک بە گەشتیارەکان دابین دەکرێ.
داخرانی سنوورەکان بە شێوەی ڕاستەوخۆ و ناڕاستەوخۆ کاریگەرییان لەسەر دۆخی ئابووریی کاسبکارانی ئەم شارە دەبێت و لە بواری ئابوورییەوە تووشی کێشەیان دەکات.
ناوەندە پێوەندیدارەکانی ڕێژیم بە بێ گرینگیدان بە دۆخی ژیانی خەڵکی ئەم سنوورانە و بە داخستنی سنوورەکان، زیانێکی ئێجگار گەورە بە کەرتی ئابووری شارەکە دەگەیێنن.
