بەپێی ڕاپۆڕتی هەواڵدەرییەکانی ڕێژیم، سپای پاسداران لە پارێزگای سنە لەژێر ناوی "ڕەزمایشی هاودڵی و یارمەتیی مۆئمێنانە" دەستی کردووە بە بڵاوکردنەوەی ژمارەیەک پاکێجی خۆراک و کەرەستەی نێوماڵ بە سەر خەڵکدا.
بەپێی ئەم ڕاپۆڕتانە ئەمانوڵڵا گەشتاسبی فەرماندەی سپای بەیتولموقەدەس لە سنە ڕۆژی دووشەممە ٢٠ی خاکەلێوە سەبارەت بەم پاکێجانە ڕایگەیاندووە کە بەبۆنەی مانگی ڕەمەزانەوە ٨ میلیارد تمەن پاکێجی خۆراک و کەرەستەی نێوماڵ لەلایەن سپای پاسدارانەوە بڵاو دەکرێتەوە.
ئەم وتانەی گەشتاسبی و هەوڵەکانی سپای تێرۆریستیی پاسداران لە کوردستان لەکاتێکدایە کە ساڵانە سەدان میلیارد تمەن لە داهاتی سامانە سرووشتییەکانی خەڵکی ئەم پارێزگایە وەک کانزاکانی زێڕ و ئاسن لەلایەن ڕێژیم و سپای پاسدارانەوە بە تاڵان دەبرێت.
ئەمە جاری یەکەم نییە کە سپای پاسداران لە کاتی پێویستدا ئەم هەوڵانە بۆ چەواشەکاری و گۆڕینی ڕوانینی خەڵک و هەروەها سڕینەوەی تاوانەکانی، ئەنجام ئەدات.
پێشتریش لە بەرەبەری ٢٢ی ڕێبەندان و شانۆی هەڵبژاردنەکاندا، سپای پاسداران لە کوردستان لەم جۆرە هەوڵانەی بە مەبەستی ڕاکێشانی خەڵک بۆ ئەم بۆنانە، ئەنجام دابوو.
پاش شەهیدکرانی ژینا ئەمینی لەلایەن گەشتی "ئێرشاد"ی ڕێژیمەوە لە تاران و دەسپێکی ناڕەزایەتییەکان لە شارەکانی کوردستان، سپای تێرۆریستیی پاسداران ڕۆڵی سەرەکیی لە سەرکوتی ناڕازییان لە ئەستۆ گرت.
سپای پاسداران دەیهەوێت کە لەم ڕێگایەوە پەردە بە سەر تاوانەکانی خۆی لە کوردستاندا بکێشێت و لە هەژاری و دەستکورتی خەڵکیش بۆ ئەم مەبەستە کەڵک وەربگرێت.
شایانی باسە کە یەکێک لە سیاسەتەکانی ڕێژیم بەتایبەت لە ناوچە پەراوێزخراوەکان هەژارهێشتنەوەی خەڵک و سەرقلکردنیان بە پرسە ئابورییەکانە تاکوو بتوانێت لەو ڕێگەوە پێش بە سەرهەڵدانەکان و داواکارییەکانی خەڵک بگرێت.
