ڕۆژی شەممە ١٨ی خاکەلێوە، کاک محەممەدڕەشید جەهانگیری ئازەر، ناوسراو بە وەستا ڕەشید جەهانگیری، ئەندامی حیزبی دێموکراتی کوردستانی ئێران لە تەمەنی ٨٢ ساڵیدا و بە هۆی ڕووداوی هاتوچۆ کۆچی دوایی کرد.
وەستا ڕەشید کەسێکی خۆشناو، نیشتمانپەروەر و دڵسۆزی حیزبی دێموکرات بوو.
ناوبراو لە ساڵی ١٣٢١ی هەتاویدا لە گوندی دەرمان لەدایک بووە و بنەماڵەکەیان بە بەردەوامی لەگەڵ کۆماری کوردستان و بزووتنەوەی کوردستاندا بوون.
باوکی وەستا ڕەشید، کە بە کوێخا محەممەد ناسرابوو، ئەندامی حیزب بوو کە لە ساڵەکانی ٤٦_٤٧دا لەگەڵ کۆمەڵێک لە ئەندامانی حیزب لە بەندیخانەی ورمێ زیندانی کرابوو، هەر ئەمە کاریگەریی زۆری لەسەر وەستا ڕەشید دانابوو و بۆیە هەموو کات خۆی وەک لایەنگر و ئەندامی حیزب دەزانی و کار و تێکۆشانی بە تایبەت کاتێک کە حیزب لە ناوچەدا بوو دیار و بەرچاو بوو.
وەستا ڕەشید پاش ئاشکرابوونی خەباتی حیزب دەستی بە کار و تێکۆشانی حیزبی کرد و هەوڵی ناساندنی حیزبی دێموکراتی بە خەڵک لەو ناوچەیەدا دەدا.
ناوبراو هەتا دوایین ساتەکانی ژیانی، وەفادار بە ڕێبازی حیزبی دێموکرات و ئارامنەکانی ئەەم حیزبە مایەوە.
ناوەندی ڕاگەیاندنی حیزبی دێموکراتی کوردستانی ئێران بەم بۆنەوە سەرەخۆشی لە بنەماڵە و خزم وکەسوکاری ناوبراو دەکات و خۆی بە هاوبەشی خەمیان دەزانێت.
